मुंबई। नगर सहयाद्री
शिवसेना एकनाथ शिंदे गटाची लोकसभा उमेदवारांची पहिली यादी जाहीर झाली आहे. आठ जागांवरच्या उमेदवारांची नावं जाहीर करण्यात आली आहेत. या यादीत विद्यमान १३ खासदारांपैकी सात खासदारांना संधी देण्यात आली असून शिंदे गटाच्या पहिल्या यादीत डॉ. श्रीकांत शिंदे यांचा समावेश केला नसल्याने आश्चर्य व्यक्त होत आहे.
शिंदे गटाने आपल्या आठ उमेदवारांची नावे जाहीर केली. या आठपैकी पाच लोकसभा मतदारसंघांत शिंदे यांची लढत शिवसेना उद्धव बाळासाहेब ठाकरे पक्षाच्या उमेदवारांशी होणार आहे. जून २०२२ मध्ये शिवसेनेत उभी फूट पडल्यानंतर ठाकरे आणि शिंदे गट प्रथमच निवडणुकीच्या माध्यमातून एकमेकांसमोर उभे ठाकले आहे.
शिर्डी लोकसभेची जागा मात्र सदाशिव लोखंडे यांना मिळाली असून काही विद्यमान खासदार अजून गॅसवर आहे. शिंदे गट आणि भाजपमध्ये ठाण्याच्या जागेवर अद्याप रस्सीखेच सुरु आहे. त्यामुळे शिंदे गट ठाणे लोकसभा मतदारसंघ भाजपला सोडणार का? याकडे सर्वांचे लक्ष लागले आहे.
शिवसेना शिंदे गटाचे उमेदवार
दक्षिण मध्य मुंबई : राहुल शेवाळे
कोल्हापूर: संजय मंडलिक
शिर्डी : सदाशिव लोखंडे
बुलढाणा प्रतापराव जाधव
हिंगोली : हेमंत पाटील
मावळ : श्रीरंग बारणे
रामटेक : राजू पारवे
हातकणंगले : धैर्यशील माने
