पारनेर। नगर सहयाद्री
येथील वाळू तस्कराला १० लाख ३० हजार रुपयांच्या मुद्देमालासह अटक करण्यात स्थानिक गुन्हे शाखेच्या पथकाला यश आले आहे. कृष्णा गीताराम सोनवणे (वय ३१, रा. वासुंदे, ता. पारनेर) असे जेरबंद आरोपीचे नाव आहे. स्थानिक गुन्हे शाखेने वाळू तस्कराविरुद्ध कारवाईचा धडाका सुरू केल्याने वाळूतस्करांचे धाबे दणाणले आहे.
अधिक माहिती अशी: पारनेर तालुक्यातील अनेक भागातून अवैध वाळू उपसा मोठ्या प्रमाणावर होत असून जिल्हा पोलीस अधीक्षक राकेश ओला यांनी जिल्ह्यातील अवैध वाळू तस्करी विरोधात कारवाईचे आदेश स्थानिक गुन्हे शाखेला दिले होते. दरम्यान स्थानिक गुन्हे शाखेचा गुप्त बातमीदारा मार्फत बातमी मिळाली,की पांढर्‍या रंगाच्या ढंपरमधून कृष्णा सोनवणे देसवडे पोखरी रस्त्यालगत अवैध वाळू उपसा करत आहे.
त्यानुसार स्थानिक गुन्हे शाखेच्या पथकाने सापळा रचून आरोपीला ताब्यात घेत त्याच्या कडील ढंपर व तीन ब्रास वाळू असा १० लाख ३० हजार रुपयांचा मुद्देमाल पोलिसांनी हस्तगत केला असून पुढील तपासासाठी पारनेर पोलिसांच्या ताब्यात देण्यात आले आहे.
