श्रीगोंदा । नगर सहयाद्री
तालुक्यातील काष्टी येथील आरोग्य केंद्रात डॉक्टर आणि कर्मचारी याच्या हलगर्जीपणामुळे बाळाचा मृत्यू झाला असून संबधीतांवर वरिष्ठांनी कारवाई करावी अशी मागणी संबंधित संतप्त नातेवाईकांनी केली आहे.
अधीक माहिती अशी: २८ मार्च २०२४ रोजी गरोदर महिला निकिता नितीन माने यांना वेदना होत असल्यामुळे पती नितीन माने यांनी घराजवळच असणार्या काष्टी आरोग्य केंद्रात निकिताला सकाळी ११ वाजता प्रसुतीसाठी दाखल केले. दिवसभर त्यांना खुप त्रास झाला तरी आरोग्य केंद्रातील कर्मचारी यांनी गांभीर्याने दखल घेतली नाही. शेवटी रात्री आठ वाजता निकिताची प्रसुती झाली.
तेव्हा येथील कर्मचार्यांनी बाळाला पुढील उपचारासाठी दौंड जि. पुणे येथे पाठवले परंतु येथे गेल्यावर डॉक्टरांनी बाळाला मृत घोषित केले. काष्टी आरोग्य केंद्राची जबाबदारी डॉक्टरांची असताना मग डॉक्टर असुन सुद्धा डिलेवरी कर्मचार्यांनी का केली? असा संतप्त सवाल नातेवाईकांनी केला आहे. डॉक्टर आणि आरोग्य केंद्रातील कर्मचारी यांच्या दोन वेगवेगळ्या प्रतिक्रिया आल्याने नेमका बाळाचा मृत्यू कशामुळे झाला कोणालाही सांगता येईना.
परंतु आरोग्य केंद्रात डॉक्टराची चोवीस तास सेवा देण्याची भूमिका असतांना आपल्या कर्तव्यात हलगर्जीपणा का केला? यामुळे संबंधित डॉक्टर व कर्मचारी यांच्यावर वरिष्ठांनी कायदेशीर कारवाई करावी अशी मागणी माने कुटुंबातील सदस्यांनी केली आहे. मयत बाळाची आई आता खाजगी रुग्णालयात उपचारासाठी दाखल आहे. तिची प्रकृती चांगली नाही. पहिलीच प्रसूती आणि घरात येणारी लक्ष्मी गेल्याने नातेवाईकाना मोठा धक्का बसला आहे.
