अहमदनगर। नगरसह्याद्री-
राहत्या घरी गांजा ठेवून त्याची विक्री करीत असल्याचे समजल्याने सहायक पोलिस निरीक्षक हेमंत थोरात यांच्या पथकाने कोपरगाव तालुक्यातील मंजूर या गावी अवैध गांजा बाळगणारर्‍या संबंधित व्यक्तीच्या घरावर छापा मारून एक लाख ०६ हजार १५० रुपयांचा गांजा जप्त केला आहे. तसेच आरोपी प्रदीप बाजीराव पायमोडे (वय-३२) याच्या विरोधात गुन्हा दाखल केला आहे. त्याला जेरबंद करण्यात आले आहे. स्थानिक गुन्हे शाखेच्या पथकाने ही कारवाई केली.
आगामी लोकसभा निवडणुकीच्या अनुषंगाने नगर जिल्हा पोलीस अधीक्षक राकेश ओला यांनी स्थानिक गुन्हे शाखेचे पोलीस निरीक्षक दिनेश आहेर, यांना जिल्ह्यातील अवैध धंद्यांविरोधात कारवाई करण्याबाबत आदेश दिले होते. त्यानुसार दिनेश आहेर यांनी स्थानिक गुन्हे शाखेतील सहायक पोलीस निरीक्षक हेमंत थोरात, अंमलदार बाळासाहेब मुळीक, संतोष खैरे, बाळासाहेब गुंजाळ, उमाकांत गावडे व कॉन्स्टेबल प्रियंका चेमटे यांचे पथक नेमून त्यांना सूचना देऊन मार्गदर्शन केले. हे पथक कोपरगांव पोलीस स्टेशन हद्दीत अवैध धंदे करणार्‍या इसमांची माहिती काढत असतांना सपोनि हेमंत थोरात यांना ३१ मार्च प्रदीप बाजीराव पायमोडे (रा. मंजुर, ता. कोपरगांव) हा स्वत:च्या घरी गांजा विक्री करतो अशी खात्रीशीर माहिती मिळाली. त्यानंतर पथकाने तात्काळ कोपरगांव तालुका पोलीस स्टेशनमधील पोलीस निरीक्षक संदीप कोळी व सहकारी तसेच पंच यांना घेऊन छाप्याचे नियोजन केले.
संबंधित पथकाने लागलीच मंजूर येथे जाऊन संशयित प्रदीप पायमोडे याच्या घरावर छापा घातला. तेव्हा पायमोडे हा घरात लोखंडी कॉटवर बसलेला दिसला. त्यास पथकाची ओळख सांगून विचारले असता त्याने त्याचे नाव प्रदीप बाजीराव पायमोडे असे असल्याचे सांगितले. त्याच्या घराची पंचासमक्ष झडती घेतली असता घरातील कॉटवर पिवळ्या रंगाच्या गोणीत उग्र वास येत असलेल्या बिया बोंडे, काड्या पाने संलग्न असलेला पाला आढळून आला. पथकाने या बाबत विचारणा केली असता त्याने तो पाला गांजा असून विक्रीसाठी आणल्याचे सांगितले.
तेव्हा पथकाने एक लाख ०६ हजार १५० रुपये किमतीचा १० किलो ७३२ ग्रॅम वजनाचा गांजा हस्तगत केला. संबंधित प्रदीप पायमोडे या आरोपीविरुद्ध स्थानिक गुन्हे शाखेचे पोलीस कॉन्स्टेबल बाळासाहेब अशोक गुंजाळ यांनी दिलेल्या फिर्यादीवरून कोपरगाव तालुका पोलीस स्टेशन येथे गुन्हा दाखल करण्यात आला आहे. आरोपी पायमोड यास जेरबंद करण्यात आले आहे. ही कारवाई जिल्हा पोलीस अधीक्षक राकेश ओला, श्रीरामपूरचे अपर पोलीस अधीक्षक वैभव कलुबर्मे व शिर्डीचे उपविभागीय पोलीस अधिकारी शिरीष वमने यांच्या सूचना व मार्गदर्शना खाली स्थानिक गुन्हे शाखेचे पोलीस अधिकारी व अंमलदार यांनी केली.
