अहमदनगर । नगर सहयाद्री-
पाथर्डी रस्त्यावरील चाँदबिवी महाल परिसरात बारदारी शिवारात एका जणांचा मृतदेह आढल्याने शहरात एकच खळबळ उडाली आहे. प्रशांत जगन्नाथ घाटबिसावे (वय २८ रा. केळ पिंपळगाव ता. आष्टी, जि. बीड) असे खून झालेल्या तरुणाचे नाव आहे. पती पत्नीच्या वादातून सासुरवाडीत दारू पाजून मारहाण करून त्याचा खून केल्याची माहिती समोर आली आहे.
याप्रकरणी मयत प्रशांत यांचा चुलत भाऊ किशोर बापुराव घाटविसावे (वय ३६ रा. केळ पिंपळगाव) यांनी दिलेल्या फिर्यादीवरून नगर तालुका पोलीस ठाण्यात मयत प्रशांत यांच्या पत्नीसह सहा जणांविरुध्द खुनाचा गुन्हा दाखल करण्यात आला आहे. पत्नी कल्याणी प्रशांत घाटविसावे (मूळ रा. केळ पिंपळगाव, हल्ली रा. शास्त्रीनगर, केडगाव), सोमनाथ बनकर, मेव्हणा अजय सोमनाथ बनकर, सासू वैशाली सोमनाथ बनकर, मेव्हणी प्रियंका सोमनाथ बनकर (सर्व रा. शास्त्रीनगर, केडगाव), अजयचा मेव्हणा मोहित दिनेश पाडळे (रा. भोरी चाळ, रेल्वे स्टेशन रस्ता, केडगाव) अशी गुन्हा दाखल झालेल्यांची नावे आहेत.
नेमकं प्रकरण काय?
प्रशांत घाटविसावे व त्यांची पत्नी कल्याणी यांच्यात वाद झाले होते. प्रशांत हे सासुरवाडी केडगाव येथे एका कार्यक्रमासाठी आले होते. मंगळवारी त्यांना संशयित आरोपी यांनी दारू पाजून मारहाण केली. मारहाणीत गंभीर जखमी झालेल्या प्रशांत यांचा मृत्यु झाला. दरम्यान त्यांचा मृतदेह पाथर्डी रस्त्यावर चांदबिबी महाले फाट्याच्या पुढे रस्त्यापासून काही अंतरावर बारदी शिवारात टाकून दिला असल्याचे फिर्यादीत म्हटले आहे.
