अहमदनगर । नगर सहयाद्री-
इंटरनेटच्या जमान्यात सायबर क्राईम मध्ये वाढ होत चालली आहे. त्यातच आता शहरामधून एक बातमी समोर आली आहे. ‘व्हॉट्सअॅप’ वर आलेल्या कस्टमर सपोर्ट एपीके फाईलवर क्लिक केल्यानंतर एक लाख ८० हजार ४१३ रुपये डेबिट झाल्याचा धक्कादायक प्रकार समोर आला आहे. याप्रकरणी फसवणूक झालेल्या तरुणांनी दिलेल्या फिर्यादीवरून कोतवाली पोलीस ठाण्यात गुन्हा दाखल करण्यात आला आहे.
अधिक माहिती अशी: फिर्यादी वेगवेगळ्या बँकांचे क्रेडिट कार्ड वापरतात. ते १० जून रोजी दुपारी साडेबाराच्या सुमारास घरी असताना मोबाईलवरील व्हॉट्सअ‍ॅपवर अनोळखी व्हॉट्सअॅप नंबरवरून कस्टमर सपोर्ट एपीके फाईल आली. त्यांनी ती फाईल पाहण्यासाठी त्यावर क्लिक केले.
क्लिक करताच त्यांच्या मोबाईलवर ओटीपी आले. त्यानंतर त्यांच्या एस बँकेच्या क्रेडिट कार्डवरून तीन हजार दोन रुपये डेबिट झाले. त्यानंतर त्यांच्या एचडीएफसी, एवं, आयसीआयसीआय, एसबीआय अशा बैंक खात्याच्या क्रेडिट कार्डमधून टप्प्याटप्याने एकूण एक लाख ८० हजार ४१३ रूपये डेबिट झाल्याचे मेसेज आले. त्यानंतर आपली फसवणूक झाल्याचे फिर्यादी यांच्या लक्षात आले. त्यानंतर त्यांनी पोलीस ठाणे गाठत फिर्याद दिली.
