श्रीगोंदा। नगर सहयाद्री-
श्रीगोंदा सहकारी साखर कारखान्याचे उपाध्यक्ष बाबासाहेब भोस यांनी नुकतीच खा. शरद पवार यांची भेट घेतल्याने त्यांच्या घरवापसीची चर्चा रंगली आहे. त्यामुळे उपमुख्यमंत्री अजित पवार यांनी राज्याची व जिल्ह्याची जबाबदारी दिलेल्या अनुराधा व राजेंद्र नागवडे यांना होमपीचवरच मोठा धक्का बसण्याची शक्यता निर्माण झाली आहे.
शुक्रवारी (दि.५) रोजी सायंकाळी जेष्ठ नेते बाबासाहेब भोस यांनी खा. शरद पवार यांची पुण्यातील निवासस्थानी भेट घेतली. यावेळी माजी आमदार दादाभाऊ कळमकर उपस्थित होते. या भेटीमुळे भोस पुन्हा शरद पवार गटात प्रवेश करणार असल्याच्या चर्चेला उधाण आले आहे.
दरम्यान, शरद पवार गटाचे लोकसभेचे उमेदवार निलेश लंके हे भोस यांचे नातेवाईक आहेत. लोकसभा निवडणुकीत लंके यांना मदत करण्याची भोसांची भूमिका असल्याची चर्चा आहे. त्यामुळे लोकसभा निवडणुकीच्या पार्श्वभूमीवर भोस यांचा शरद पवार गटात प्रवेश होण्याची अटकळ बांधली जात आहे.
