अहमदनगर | नगर सह्याद्री
पाणलोट क्षेत्रात मान्सून पुन्हा सक्रीय झाल्याने आषाढसरी अधूनमधून जोरदार बरसत आहेत. परिणामी ११०३९ दलघफू क्षमतेच्या भंडारदरा धरणातील पाणीसाठा शुक्रवारी रात्री ४६ टक्के झाला होता. पाऊस टिकून राहिल्यास आज अथवा उद्या हे धरण निम्मे भरण्याची शयता आहे.
गत पाचसहा दिवसांपासून पाणलोटात पावसाचे प्रमाण घटल्याने धरणाकडे येणारा पाण्याचा ओघ मंदावला होता. पण गुरूवारी रात्रीपासून पावसाचे प्रमाण काहिसे वाढल्याने काल सायंकाळी संपलेल्या २४ तासांत धरणात ३०९ दलघफू पाणी नव्याने दाखल झाले.
त्यामुळे सायंकाळी धरणातील पाणीसाठा ५०५१ दलघफू (४५.७६टक्के) झाला होता. रात्री हा साठा ४६ टक्क्यांवर पोहचला आहे. वाकीचा ओव्हरफ्लो सुरू असल्याने निळवंडे धरणातील पाणीसाठा हळुवार वाढत आहे. काल सकाळी या धरणातील पाणीसाठा १६०८ दलघफू (१९.३१ टक्के) झाला होता.मुळा पाणलोटातही पुन्हा पाऊस सुरू झाल्याने शेतकर्‍यांना हायसे वाटले आहे. मुळा नदीचा विसर्ग ८८६ युसेकवर आला होता. शुक्रवारी कोतूळ येथे सकाळी मुळा धरणाकडे कोतूळ येथून १६३३युसेस तर सायंकाळी १३९३ युसेस पाण्याची आवक सुरू होती. मुळा धरणात अखेर नव्याने ३०४० दशलक्ष घनफूट नवीन पाण्याची आवक झाली असून मुळा धरणाचा साठा ९००६ दशलक्ष घनफूट (३५ टक्के) झाला आहे.
