नाशिक । नगर सहयाद्री:-
शेतजमिनीच्या वादातून एका वृद्ध शेतकऱ्याला जिवंत जाळल्याची धक्कादायक घटना घडली आहे. नाशिक जिल्ह्यातील निफाड तालुक्यातील एका गावात घडली. कचेश्वर नागरे (वय ८०) असं मृत शेतकऱ्याचं नाव आहे. याप्रकरणी पोलीस ठाण्यात गुन्हा दाखल करण्यात आला आहे. आरोपीवर कठोर कारवाई करण्याची मागणी मयताच्या कुटुंबीयांनी केली असून जोपर्यंत आरोपींना अटक केली जात नाही तोपर्यंत आम्ही अंत्यसंस्कार करणार नाही, अशी भूमिका नागरे कुटुंबियांनी घेतली आहे.
याबाबत अधिक माहिती अशी: शेतातील वडिलोपार्जित विहिरीवरुन नागरे बंधूंमध्ये वाद आहे. कचेश्वर नागरे हे मंगळवारी शेतातील घराजवळ साफसफाई करत असताना त्यांचा धाकटा भाऊ चांगदेव नगरे आणि भावजई आणि पुतण्यांनी कचेश्वर नागरे यांच्या अंगावर डिझेल टाकून त्यांना पेटवून दिले. आगीच्या ज्वालांनी वेढल्यानंतर कचेश्वर नागरे स्वतःला वाचण्यासाठी सैरभैर पळू लागले.
त्यांचा आवाज ऐकून त्यांचे कुटुंबीय धावत बाहेर आले. तोपर्यंत आरोपी चांगदेव नागरे आणि त्याचे कुटुंब घटनास्थळावरून पळून गेले. दरम्यान, कचेश्वर नागरे यांना तातडीने रुग्णालयात दाखल करण्यात आले. मात्र, ९५ टक्के भाजल्याने कचेश्वर नागरे यांचा उपचारादरम्यान मृत्यू झाला. या घटनेने परिसरात हळहळ व्यक्त केली जात आहे.
