मुंबई। नगर सहयाद्री-
राज्याच्या राजकारणात मोठी बातमी समोर येत आहे. राष्ट्रवादी काँग्रेसचे आमदार एकनाथ खडसे यांची भाजपात घरवापसी होणार आहे. एकनाथ खडसे यांनी स्वत: याबाबत माहिती दिली आहे. “मी भाजपात प्रवेश करणार आहे”, असं खडसे म्हणाले आहेत
एकनाथ खडसे यांनी साडेतीन वर्षांपूर्वी राष्ट्रवादी काँग्रेस पक्षात प्रवेश केला होता. या दरम्यान त्यांना राष्ट्रवादी काँग्रेस पक्षाकडून विधान परिषदेची आमदारकी देण्यात आली. ते सध्या विधान परिषदेचे आमदार आहेत. असं असताना त्यांनी आता परत भाजपात घरवापसी करण्याचा निर्णय घेतला आहे.एकनाथ खडसेंच्या भाजपा प्रवेशामुळे भाजपात एकच खळबळ उडाली आहे.
खडसेंच्या राष्ट्रवादी काँग्रेस प्रवेशानंतर भाजप नेत्यांनी त्यांच्यावर टीका केली होती. मंत्री गिरीश महाजन यांनी त्यांच्यावर सडकून टीका केली होती. आता खडसे पुन्हा स्वगृही परतणार असल्याच्या चर्चवर मंत्री गिरीश महाजन यांनी पुन्हा एकदा एकनाथ खडसेंवर निशाणा साधला आहे.
काय म्हणाले गिरीश महाजन ?
एकनाथ खडसे एका विझलेल्या दिव्यासारखे आहेत. त्यांची पत्नी व मुलीचाही निवडणुकीत पराभव झाला आहे. सध्या एकही ग्रामपंचायत त्यांच्या हातात नाही. ते एका बँकेला नियंत्रित करत होते. पण आता संचालक मंडळ बदलले असून, नव्या बोर्डाचे सदस्य त्यांचे काहीएक ऐकत नाहीत. त्यामुळे त्यांच्या भाजप प्रवेशाच्या निर्णयाला फारसे महत्त्व देण्याची गरज नाही.
