निघोज | नगर सह्याद्री:-
निघोजसह परिसरातील गावांत तसेच वाडी, वस्तीवर मंगळवारी (दि.१६) रात्री दहा ते एकच्या दरम्यान ड्रोनच्या मोठ्या प्रमाणात घिरट्या वाढल्याने जनतेमध्ये घबराट पसरली आहे. पालकमंत्री राधाकृष्ण विखे पाटील, खा. नीलेश लंके यांनी याबाबत जिल्हाधिकारी व पोलिस अधीक्षक यांना याबाबत विचारणा करत कारवाईंची मागणी केली आहे.
मंगळवारी (दि.१६) रात्री निघोज, गाडीलगाव, गुणोरे, देवीभोयरे, वडगाव गुंड, मोरवाडी, भांबरेमळा, रसाळवाडी, ढवणवाडी, वडनेर परिसरात रात्री दहा ते एक वाजेपर्यंत ड्रोन मोठ्या संख्येने आकाशात घिरट्या घालत आहेत. याबाबत शेजारील गावा असणारे वडनेर, टाकळी हाजी, माळवाडी, भाकरेवाडी या परिसरात सुद्धा गेली अनेक दिवसांपासून ड्रोन घिरट्या घालत आहेत.
याबाबत तेथील जनतेने पोलीस व तहसील प्रशासन यांना वेळोवेळी कळविले आहे. असे असूनही प्रशासनातील अधिकारी व लोकप्रतिनिधी यांनी याबाबत कोणतीही माहिती घेण्याची तसदी घेतली नाही. हाच प्रकार सातत्याने नगर जिल्ह्यातील पारनेर, श्रीगोंदा तसेच इतर तालुक्यातील गावात सातत्याने होत आहे.निघोज परिसरात तर मंगळवार दि.१६ रोजी रात्री उशिरा पर्यंत हे ड्रोन राजरोसपणे फिरत होते.
मात्र याचा शोध घेण्यासाठी प्रशासनातील अधिकारी दुर्लक्ष करत आहेत. ड्रोनचा शोध घेण्यासाठी पालकमंत्री राधाकृष्ण विखे पाटील, खासदार नीलेश लंके यांनी तातडीने प्रशासनातील संबंधित अधिकार्‍यांना सुचना देऊन ड्रोनचा शोध घेत जनतेच्या मनातील घबराट दूर करावी, अशी मागणी जनतेतून होत आहे.
