अहमदनगर / नगर सह्याद्री नगर शहरातील केडगाव येथे २०१८ साली शिवसैनिक संजय केशव कोतकर व वसंत आनंदा ठुबे यांची निर्घृण हत्या करण्यात आली होती....
अहमदनगर / नगर सह्याद्री
नगर शहरातील केडगाव येथे २०१८ साली शिवसैनिक संजय केशव कोतकर व वसंत आनंदा ठुबे यांची निर्घृण हत्या करण्यात आली होती. यातील आरोपी संदीप गुंजाळ याचा नियमित जामीन अर्ज न्यायालयाने फेटाळून लावला आहे.
नगर शहरातील केडगाव मधील नगरसेवक पदाची निवडणूक ६ एप्रिल २०१८ रोजी झाली होती. दुसऱ्या दिवशी मतमोजणी झाली. यामध्ये काँग्रेसचा नगरसेवक विजयी झाला होता. या दरम्यान निवडणूक प्रकिया सुरु असताना संजय कोतकर हे शिवसेनेचे कार्यकर्ते असल्याने विरोधी पक्षाचे कार्यकर्ते व त्यांच्यात बाचाबाची व वाद झालेले होते.
७ एप्रिल २०१८ रोजी सायं. ६ वाजे दरम्यान संजय कोतकर व वसंत ठुबे हे दोघे सुवर्णानगर केडगाव येथे असताना आरोपी संदिप गुंजाळ व इतर आरोपी यांनी त्यांना शिवीगाळ करून संदिप गुंजाळ याने संजय कोतकर यांवर गोळ्या झाडल्या. त्यांवर तलवारीने वार केले.
त्यानंतर वसंत ठुबे यांवर देखील गोळ्या घालून ठार केले होते. त्यानंतर आरोपी संदिप गुंजाळ हा पोलीस ठाण्यात हजर झाला होता. आरोपी संदीप गुंजाळ याने अहमदनगर जिल्हा व सत्र न्यायालयात नियमित जामीन अर्ज दाखल केला होता. सदरचा अर्ज न्यायालयाने फेटाळून लावला होता.
त्याविरोधात आरोपीने मुंबई उच्च न्यायालयाच्या औरंगाबाद खंडपीठात जामिनासाठी अर्ज दाखल केला. परंतु तेथेही त्याचा जामीन अर्ज फेटाळून लावण्यात आला.
COMMENTS