अहमदनगरमध्ये मराठा समाज आक्रमक; मंत्री विखे, आमदार जगताप म्हणाले...

अहमदनगर | नगर सह्याद्री जालना येथील अंतरावाली सराटी येथे मराठा आरक्षणासह अन्य मागण्यांसाठी सुरु असलेल्या आंदोलनाला शुक्रवारी हिंसक वळण लागल्...

अहमदनगर | नगर सह्याद्री

जालना येथील अंतरावाली सराटी येथे मराठा आरक्षणासह अन्य मागण्यांसाठी सुरु असलेल्या आंदोलनाला शुक्रवारी हिंसक वळण लागल्याने पोलिसांनी आंदोलकांवर लाठीचार्ज केला. या घटनेच्या निषेधार्थ सकल मराठा समाजाच्यावतीने नगरमध्ये उपोषण व मोर्चा काढण्यात आला. दरम्यान, या घटनेची सखोल चौकशी करुन दोषींवर कारवाई करावी, मराठा आरक्षण लागू करावे, अशी मागणी मोर्चेकर्‍यांनी केली. 

                                        

जालना येथे मराठा आरक्षण प्रश्नी आंदोलन करणार्‍यांवर बेछुटपणे लाठीचार्ज करण्यात आला. या घटनेचा राज्यभर निषेध नोंदवला जात आहे. लाठीचार्जमुळे राज्यभर संतप्त आंदोलनकर्त्यांकडून एसटीची तोडफोड, जाळपोळ केली जात आहे. त्यामुळे सर्व एसटी व्यवस्था बंद ठेवली आहे. तसेच चौथे शिवाजी महाराज पुतळ्यासमोर सकल मराठा समाज बांधवांच्यावतीने उपोषण सुरु करण्यात आले आहे. दुसरीकडे सकल मराठा समाजाच्यावतीने छत्रपती शिवाजी महाराज पुतळ्यापासून दुचाकी रॅली काढण्यात  आली. 

                                         

या आंदोलनात आमदार संग्राम जगताप यांच्यासह विविध संघटना सहभागी झाल्या होल्या. दुचाकी रॅली छत्रपती शिवाजी महाराज पुतळ्यापासून सुरु झाली. माळीवाडा, आशा टॉकीज चौक, भिंगारवाला चौक, तेलीखुंट, दिल्लीगेट, चौथे शिवाजी महाराज पुतळा, जिल्हाधिकारी कार्यालय व जिल्हा पोलिस अधीक्षक कार्यालयपर्यंत काढण्यात आली. मराठा समाजास आरक्षण द्यावे, हल्लेखोरांवर कारवाई करण्याबाबत निवेदन देण्यात आले. 

   

निष्ठूर फडणवीसांनी मराठ्यांची माफी मागत राजीनामा द्यावा : कुमटकर

स्मायलिंग अस्मिता कष्टकरी शेतकरी विद्यार्थी संघटनेच्या वतीने एक दिवसाचे अन्नत्याग 

जालना जिल्ह्यातील अंतरवाली सराटी येथे मराठा आंदोलकांवर लाठीचार्ज व गोळीबाराचा निषेध करण्यासाठी अहमदनगर शहरातील स्मायलिंग अस्मिता कष्टकरी शेतकरी विद्यार्थी संघटनेच्या वतीने कालच रात्रीपासून एकदिवसीय अन्नत्याग आंदोलन सुरू केले आहे.

 यावेळी बोलताना संघटनेचे धिरज कुमटकर म्हणाले यावर एकनाथ शिंदे यांनी घटनास्थळी भेट देवून मराठ्यांवर तुटून पडणा-या दोषींवर कायमस्वरूपीच्या निलंबनाची कार्यवाही करावी.मराठा समाजातील महिला व बालकांवर लाठीचार्ज व गोळीबार करण्यात आला. महिला गंभीर जखमी झालेल्या आहेत ५८ मराठा मोर्चे जगात आदर्श ठरले. मग अंतरवाली सराटीचे आंदोलन चिरडण्यासाठी इतका आततायी कृत्य का असा प्रश्नही कुमटकर यांनी उपस्थित केला. गृहमंत्री फडणवीसांनी ब्रिटिशांप्रमाणे वागत निष्ठूरता दाखवली आहे त्यामुळे त्यांनी आता राजीनामा दिला पाहिजे असेही धिरज कुमटकर म्हणाले.विनीत गाडे शुभम पांडूळे आणि यशवंत तोडमल यांनी विद्यार्थ्यांना शांतता बाळगण्याचे आवाहन केले आहे. यावेळी अमोल गाडे,डॉ अमित पवार, डॉ गणेश जंगले गजानन भांडवलकर, निलेश म्हसे,प्रविण गांगर्डे,मयुर ढगे,हेमंतराव मुळे,राजेंद्र ससे आदिंसह मराठा समाजातील नागरिक सहभागी झाले होते

आरक्षण दिल्‍याशिवाय आम्‍ही स्‍वस्‍थ बसणार नाही : मंत्री विखे पाटील 

मराठा समाजाला आरक्षण मिळावे ही सरकारची भूमिका आहे. यामध्‍ये सरकार कुठेही कमी पडणार नाही. यापुर्वी देवेंद्रजी फडणवीस मुख्‍यमंत्री असताना समाजाला मिळालेले आरक्षण पुन्‍हा प्रस्‍तापित होणे हाच सरकारचा प्रयत्‍न आहे. आरक्षण दिल्‍याशिवाय आम्‍ही स्‍वस्‍थ बसणार नाही.  परंतू आता समाजातील तरुणांचा बुध्‍दीभेद करण्‍याचा प्रयत्‍न सुरु झाला आहे. याला समाजाने बळी पडू नये असे आवाहन महसूल, पशुसंवर्धन व दूग्‍ध  व्‍यवसाय विकास मंत्री राधाकृष्‍ण विखे पाटील यांनी केली. जालना येथील घडलेल्‍या घटनेबाबत आपली प्रतिक्रीया व्‍यक्‍त  करताना मंत्री विखे पाटील म्‍हणाले की या घटनेचे समर्थन मुळीच नाही, या घटनेबाबत सरकारने चौकशीचे सर्व आदेश दिलेले आहेत. दोषिंवर निश्चित कारवाई होईल असे स्‍पष्‍ट करुन, केवळ आता आरक्षणाच्‍या  प्रश्‍नावरुन गृहमंत्री देवेंद्र फडणवीस यांना बदनाम करण्‍याचा प्रयत्‍न  जाणीवपुर्वक केला जात आहे हे अत्‍यंत दुर्दैवी आहे. एक गोष्‍ट लक्षात घेतली पाहीजे की, राज्‍यात मुख्‍यमंत्री पदावर असताना देवेंद्र फडणवीस यांच्‍या प्रयत्‍नांमुळेच मराठा समाजाला दिलेले आरक्षण सर्वोच्‍च  न्‍यायालयाने मान्‍य केले होते. मात्र मागील अडीच वर्षे राज्‍यात आघाडी सरकार सत्‍तेवर होते. आरक्षणाच्‍या मुद्यावर या सरकारने गंभिरतेने कोणत्‍याही उपाय योजन केल्‍या नाहीत त्‍यामुळेच मराठा समाजाच्‍या  हक्‍काचे आरक्षण गमवावे लागले हे सुध्‍दा दुर्लक्षित करुन चालणार नाही.  मागच्‍या सरकारमुळे गेलेले आरक्षण पुन्‍हा प्रस्‍तापित करण्‍यासाठी राज्‍य सरकारने सर्वतोपरी प्रयत्‍न सुरु केले असून, समाजाला आरक्षण दिल्‍याशिवाय आम्‍ही स्‍वस्‍थ बसणार नाही ही सरकारची भूमिका असल्‍याचे सांगून आरक्षण मिळविण्‍यासाठी सरकारची भावना अतिशय गंभिर आणि प्रामाणिक आहे. त्‍यामुळे समाज बांधवांनी शातंता राखण्‍याचे आवाहन करुन, विरोधकांकडून होत असलेल्‍या बुध्‍दीभेदाला बळी पडू नये असेही त्‍यांनी सुचित केले आहे.

आ. संग्राम जगताप आक्रमक

मराठा समाजातील काही कुटुंबांना आरक्षणाची अत्यंत गरज आहे, यासाठी सकल मराठा समाज आरक्षणासाठी लाखोंच्या संख्येने ऐतिहासिक मूक मोर्चा काढून लोकशाही मार्गाने सरकारकडे मागणी केली. त्यावेळी कोणताही अनुचित प्रकार घडला नाही, मात्र जालना जिल्ह्यातील अंतरवाली सराटी येथे मराठा आरक्षणासह अन्य मागण्यांसाठी समाजबांधवांकडून उपोषण सुरू होते. या आंदोलकांवर पोलिसांकडून अमानुषपणे लाठीचार्ज करण्यात आला. या सदर घटनेचा लोकप्रतिनिधी या नात्याने निषेध करत आहे. यासाठी पोलीस प्रशासानाला आदेश देणाऱ्याचा शोध घ्यावा. आता मूक मोर्चा काढत आपण मुके होण्याची वेळ आली, हे करण्यापेक्षा समाजाने एकत्र येवून आपल्या न्याय हक्कासाठी आक्रमक होणे गरजेचे आहे. आम्ही जरी सरकारमध्ये असलो तरी सरकारविरोधात लोकांच्या हितासाठी दोन हात करू असा इशारा आ. संग्राम जगताप यांनी दिला.

जालना जिल्ह्यातील अंतरवाली सराटी येथे मराठा आरक्षणासाठी मराठा समाजाने केलेल्या उपोषणावर पोलिसांनी केलेल्या अमानुष लाठीचार्ज घटनेच्या निषेधार्थ सकल मराठा समाजाच्या वतीने निवासी जिल्हाधिकारी यांना निवेदन देण्यात आले. यावेळी आ.संग्राम जगताप, सकल मराठा समाजाचे जिल्हाअध्यक्ष चंद्रकांत गाडे, उपमहापौर गणेश भोसले, अविनाश घुले, प्रा. माणिक विधाते, संपत बारस्कर, विनीत पाऊलबुद्धे, बाळासाहेब पवार, अभिजित खोसे, निखिल वारे, खासेराव शितोळे, बापूसाहेब कांडेकर, मंत्री पांडूळे, अरविंद शिंदे, कुमारसिंह वाकळे, अजिंक्य बोरकर, प्रकाश भागानगरे, विठ्ठल गुंजाळ, वैभव ढाकणे, संतोष ढाकणे, योगेश ठुबे, अजित कोतकर, मंगेश खताळ, शिवाजी डोके, बाळासाहेब बारस्कर, सतीश बारस्कर, तुकाराम तावरे, रामकृष्ण कर्डिले, महेश दळवी, बापू राजेभोसले आदी उपस्थित होते.