भोंदूबाबा व सहकाऱ्यांचा महिला पोलिसावर अत्याचार

तक्रारदार महिला ही पोलिस कर्मचारी असून तिच्या पतीच्या माध्यमातून भोंदूबाबाशी ओळख झाली होती.

डहाणू । नगर सह्याद्री 

भोंदूबाबांनी महिला पोलिस कर्मचाऱ्यावर लैंगिक अत्याचार केल्याचा धक्कादायक प्रकार समोर आला आहे. गेल्या पाच वर्षांपासून हा प्रकार सुरु होता. याप्रकरणी तलासरी पोलिसांनी पाच जणांना अटक केली आहे.

तक्रारदार महिला ही पोलिस कर्मचारी असून तिच्या पतीच्या माध्यमातून भोंदूबाबाशी ओळख झाली होती.  पतीला सरकारी नोकरी लागेल, तसेच घरगुती समस्या दूर होतील, असे सांगून त्याच्या साथीदारांनी जादूटोणा विधी केला.  त्यानंतर पंचामृतात गुंगीचे औषध घालून महिलेला अज्ञातस्थळी नेहून भोंदूबाबा रवींद्र भाटे, दिलीप गायकवाड, गौरव साळवी यांनी तिच्यावर लैंगिक अत्याचार केला. 

याप्रकरणी सर्वानी दोन लाख दहा हजार रुपये व सोन्या-चांदीचे दागिने लंपास केले आहेत. सततच्या त्रासाला कंटाळून अखेर पोलिस महिलेने तलासरी पोलिस ठाण्यात फिर्याद दाखल केली. या सर्वांवर कलम ३७६, ३७६(२), ४२०, ३४ या अंतर्गत तसेच महाराष्ट्र नरबळी व इतर अमानुष, अनिष्ट व अघोरी प्रथा आणि जादूटोणा प्रतिबंध अधिनियम २०१३मधील कलम २, ३, ८ प्रमाणे गुन्हा दाखल करण्यात आला आहे.