अहमदनगर | नगर सह्याद्री न्यायालयात पोटगीची केस दाखल केल्याच्या रागातून जावयाने सासूचा खून करून मृतदेह पोत्यात घालून सीतेवाडी फाटा ते जुन्नर ...
अहमदनगर | नगर सह्याद्री
न्यायालयात पोटगीची केस दाखल केल्याच्या रागातून जावयाने सासूचा खून करून मृतदेह पोत्यात घालून सीतेवाडी फाटा ते जुन्नर रस्त्यावरील गणेशखिंड (ता. जुन्नर, जि. पुणे) येथील दरीत फेकून दिल्याचा धक्कादायक प्रकार उघडकीस आला आहे. लताबाई अरूण कडव (वय ७० रा. शिवाजीनगर, कल्याण रस्ता) असे मृत महिलेचे नाव आहे.
या प्रकरणी जुन्नर पोलीस ठाण्यात जावई बाळू तुकाराम विधाते (रा. शिवाजीनगर, कल्याण रस्ता) याच्याविरूद्ध खुनाचा गुन्हा दाखल केला असून तो नगर तालुका पोलिसांकडे वर्ग झाला आहे. या प्रकरणी मृत लताबाई यांचे दुसरे जावई अण्णा प्रभाकर ढेरे (वय ५१ रा. बोल्हेगाव फाटा, नगर) यांनी फिर्याद दिली आहे. लताबाई व त्यांचा जावई बाळू हा पत्नी मुलाबाळांसह शिवाजीनगर परिसरात राहतात. बाळू व त्याची पत्नी मीना यांचे लताबाई यांच्याशी मागील काही दिवसांपासून वारंवार वाद होत होते. या प्रकरणी लताबाई यांनी कोतवाली पोलीस ठाण्यात तक्रार दिली आहे. ३० ऑगस्टला लताबाई त्यांचे मानलेले भाऊ शिवाजी निवृत्ती काळे (रा. हिवरेझरे, ता. नगर) यांना राखी बांधण्यासाठी गेल्या होत्या. त्या ३१ ऑगस्टला काळे यांच्या जवळील शेतात रूईची पाने तोडण्यासाठी गेल्या असता तेथून बेपत्ता झाल्या. त्यांचा परिसरात शोध घेतला असता काळे यांच्या शेतातील रूईच्या झाडाजवळ लताबाई यांचा चष्मा, पायातील चप्पल व प्लॅस्टिकची गोणी तसेच फुटलेल्या बांगड्यांचे तुकडे आढळले. तीन दिवस शोध घेतल्यानंतरही त्या मिळून न आल्याने ४ सप्टेंबरला नगर तालुका पोलीस ठाण्यात मिसींगची तक्रार दाखल करण्यात आली. पोलिसांकडून लताबाईंचा शोध सुरू असताना त्यांचा खून झाल्याचे समोर आले आहे.
३१ ऑगस्टला लताबाई हिवरेझरे येथे काळे यांच्या शेतात असताना तेथे जावई बाळू आला. त्यांच्यात पोटगीची केस केल्याच्या कारणातून वाद झाला. या वादातून बाळूने लताबाई यांच्या डोयात लाकडी दांडा घालून खून केला. मृतदेह तवेरा गाडीच्या डिकीत टाकून गाडी सीतेवाडी फाटा येथून जुन्नर रस्त्याने गणेशखिंड येथे आणली. मृतदेह पोत्यात भरून झाडाझुडपातील दरीत फेकून दिल्याची कबूली आरोपीने दिली आहे.
COMMENTS