नगरमध्ये भररस्त्यात डॉटरवर हल्ला

जमिनीचा वाद ः हल्लेखोराला जमावाने पकडून केले पोलिसांच्या हवाली   अहमदनगर | नगर सह्याद्री सकाळी बॅडमिंटन खेळण्यासाठी जात असलेल्या डॉटरला भर र...

जमिनीचा वाद ः हल्लेखोराला जमावाने पकडून केले पोलिसांच्या हवाली  

अहमदनगर | नगर सह्याद्री

सकाळी बॅडमिंटन खेळण्यासाठी जात असलेल्या डॉटरला भर रस्त्यात अडवून त्यांच्यावर लोखंडी खिळे लावलेल्या लाकडी दांडयाने जीवघेणा हल्ला केल्याची घटना सारसनगर परिसरात बुधवारी (दि.१६) सकाळी ७.३० च्या सुमारास घडली. या हल्ल्यानंतर तेथे नागरिक जमा झाले व त्यांनी हल्लेखोराला पकडून चोप देत पोलिसांच्या हवाली केले. 

याबाबत डॉ. सचिन कांतीलाल भंडारी यांनी भिंगार कॅम्प पोलिस ठाण्यात फिर्याद दिली आहे. भीमराज पालडिया (रा. चिपाडे मळा, सारसनगर) असे आरोपीचे नाव आहे. डॉ. भंडारी यांचे सारसनगर भागात राज हॉस्पिटल आहे. त्यांच्या दवाखान्यात भीमराज पालडिया येत असल्याने त्या दोघांची ओळख होती. २०१२ मध्ये डॉ. भंडारी यांचे नातेवाईक गुगळे यांचा एक प्लॉट विकायचा होता. पालडिया व त्याच्या दोन भावांनी डॉ. भंडारी यांच्याकडे येऊन तुमच्या नातेवाईकाचा प्लॉट आम्ही घेतो, असे म्हणून व्यवहार केला. ५ वर्षांनी भीमराज पालडिया याने डॉ. भंडारी यांना तुम्ही माझी प्लॉट व्यवहारात फसवणूक केली, असे म्हणत मारहाण केली होती. त्यावेळी पोलिस ठाण्यात गुन्हा दाखल केला होता. त्यानंतर अधून मधून पालडिया डॉ. भंडारी यांना फोन करत पैशांची मागणी करत होता. बुधवारी (दि.१६) सकाळी डॉ. भंडारी मोपेडवरून जात असताना सारसनगरमधील महावीर सुपर मार्केटजवळ पालडिया याने डॉ. भंडारी यांना अडवले व त्याच्या कडील लोखंडी खिळे लावलेल्या लाकडी दांडयाने हल्ला केला. डॉटरांनी तो हल्ला चुकविण्याचा प्रयत्न केला असता त्यांच्या हाताला व खांद्याला जखम झाली. ते मोपेडवरून खाली पडले, त्यावेळी पालडिया याने त्याच्या खिशातून काळ्या रंगाच्या स्प्रेची बाटली काढून स्प्रे मारण्याचा प्रयत्न केला. ही झटापट पाहून नागरिक जमा झाले व त्यांनी हल्ला करणार्‍या पालडिया याला पकडले. काहींनी पोलिसांना फोन करून माहिती दिली. थोड्या वेळात पोलिस तेथे आले व नागरिकांनी पालडिया याला पोलिसांच्या ताब्यात दिले. याबाबत डॉ. भंडारी यांनी दिलेल्या फिर्यादीवरून पोलिसांनी भीमराज पालडिया याच्यावर गुन्हा दाखल केला आहे.