त्र्यंबकेश्वर येथील पहिने येथे एका खासगी संस्थेच्या वसतिगृहात अल्पवयीन मुलींना पर्यटकासमोर नाचण्यास भाग पाडल्याची घटना समोर आली आहे.
महाराष्ट्रातील नाशिक जिल्ह्यातील त्र्यंबकेश्वर येथील पहिने येथे एका खासगी संस्थेच्या वसतिगृहात अल्पवयीन मुलींना पर्यटकासमोर नाचण्यास भाग पाडल्याची घटना समोर आली आहे. मुलींच्या नातेवाइकांना हा प्रकार कळताच त्यांनी आपल्या मुलींना घरी नेले. याप्रकरणी पालकांनी नाराजी व्यक्त केल्यानंतर संस्थेच्या चालक व शिक्षकाविरुद्ध वाडीवर्‍हे पोलिस ठाण्यात गुन्हा दाखल करण्यात आला आहे.
वास्तविक गेल्या काही वर्षांपासून पहिने येथे एक विनाअनुदानित इंग्रजी माध्यमाची प्राथमिक शाळा आहे. ह्या वर्षी शाळेला लागूनच मुलींचे वसतिगृहही सुरू करण्यात आले. पंधरा दिवसांपूर्वी शाळा सुरू झाली तेव्हा ३१ मे २०२३ पासून इयत्ता सातवी ते नववीच्या विद्यार्थ्यांना वसतिगृहात प्रवेश देण्यात आला. संस्थेने सांगितले होते की, सुट्ट्यांमध्ये मुलींना पारंपरिक नृत्य आणि संगणकाचे धडे दिले जातील. प्रत्यक्षात त्यांना संगणकाचे कोणतेही शिक्षण दिले जात नसल्याचा आरोप विद्याथिनींनी केला.
संस्थेची फक्त सहावीपर्यंतच शाळा असल्याने मुलींना त्र्यंबकेश्वर येथील शाळेत शिक्षणासाठी पाठवले जाते. मुलीसाठी पालकांनी ३५०० रुपये जमा केले होते. शाळेच्या पाठीमागील टेकडीवर संस्थेचे हॉटेल आहे, तेथे मे महिन्याच्या शेवटी पर्यटक कासवांना पाहायला येतात. त्यावेळी मुलींना संध्याकाळी ६ ते ९ या वेळेत पर्यटकांसमोर नाचण्यास सांगितले होते. विद्यार्थिनींनी आपल्या पालकांकडे अशी तक्रार केली की, जर ते नाचले नाही तर व्यवस्थापनाच्या सांगण्यावरून शिक्षक त्यांच्या सोबत जबरदस्ती करायचे आणि काठ्यांनी मारहाण करायचे. त्यामुळे संतप्त झालेल्या कुटुंबीयांनी मुलींना घरी आणले आणि १८ जून रोजी वाडीवर्‍हे पोलिस ठाण्यात तक्रार दाखल करण्यात आली. या मुलींना आता दुसऱ्या शाळेत दाखल केल्याचे पालकांनी सांगितले.
या प्रकरणी वसतिगृहात चौकशी केली असता त्यांनी सांगितले की, पर्यटक वसतिगृहात शिक्षक विद्यार्थिनींना पारंपारिक नृत्य शिकवतांना पाहत असतील. परंतु मुलींना कोणत्याही प्रकारे इतरांसमोर नाचण्यास सांगितले जात नाही.
COMMENTS