महापालिका आयुक्त डॉ. जावळे यांना 'हा' पुरस्कार प्रदान

अहमदनगर | नगर सह्याद्री  अनुसुचित जाती-जमाती शासकीय, निमशासकीय अधिकारी, कर्मचारी संघटनेतर्फे छ्त्रपती शिवाजी महाराज, क्रांतिसूर्य महात्मा फु...

अहमदनगर | नगर सह्याद्री 

अनुसुचित जाती-जमाती शासकीय, निमशासकीय अधिकारी, कर्मचारी संघटनेतर्फे छ्त्रपती शिवाजी महाराज, क्रांतिसूर्य महात्मा फुले व भारतीय राज्यघटनेचे शिल्पकार डॉ. बाबासाहेब आंबेडकर यांचा संयुक्त जयंती सोहळा मंत्रालयातील त्रिमूर्ती प्रांगणात आयोजित करण्यात आला होता. यावेळी संघटनेतर्फे देण्यात येणारा सन २०२३ चा डॉ. बी. आर. आंबेडकर राज्यस्तरीय उत्कृष्ट अधिकारी पुरस्कार अहमदनगर महापालिकेचे आयुक्त डॉ. पंकज जावळे यांना प्रदान करण्यात आला. 

पाच हजार ५१ रुपये रोख, सन्मान चिन्ह असे पुरस्काराचे स्वरूप आहे. यावेळी शालेय शिक्षण मंत्री दीपक केसरकर, आमदार भरत गोगावले, उद्योग विभागाचे प्रधान सचिव डॉ. हर्षदीप कांबळे, संघटनेचे अध्यक्ष भारत वानखेडे, उत्सव समितीचे अध्यक्ष लक्ष्मीकांत ढोके, सविता शिंदे यांच्यासह संघटनेचे पदाधिकारी उपस्थित होते. रोजगार हमी व फलोत्पादन मंत्री संदीपान भुमरे, महिला व बालविकास मंत्री मंगलप्रभात लोढा, माजी सामाजिक न्याय मंत्री राजकुमार बडोले, आमदार भरत गोगावले, आमदार संतोष बांगर, माजी आमदार शिरीष चौधरी आदींनी सोहळ्यास भेट देऊन शुभेच्छा दिल्या.

उपमुख्यमंत्री देवेंद्र फडणवीस यांनी संघटनेच्या माध्यमातून दरवर्षी विविध उपक्रम राबविले जातात. अशाच प्रकारचा हा उपक्रम आहे. संघटनेच्या मागण्यांबाबत राज्य शासन सकारात्मक आहे, असा संदेश दिला. शालेय शिक्षण मंत्री केसरकर म्हणाले, संघटनेतर्फे दरवर्षी प्रबोधनपर उपक्रम राबविले जातात. या संघटनेचे नेहमीच सहकार्य राहिले आहे. यावेळी व्याख्याते रवींद्र शिवाजी केसकर यांनी ’माणसाची एकच जात, दोन पाय- दोन हात’ या विषयावर मार्गदर्शन केले. संगीतकार जॉली मोरे, शाहीर सीमा पाटील यांनी भारतीय संविधानाची गौरवगाथा या विषयावर प्रबोधन गीते सादर केली. यावेळी शासकीय अधिकारी, कर्मचारी, संघटनेचे पदाधिकारी मोठ्या संख्येने उपस्थित होते.