भ्रष्टाचार्‍यांना ७० टक्के, रस्त्याला ३० टक्के ; 'यांनी' केले अनोखे आंदोलन

शहर काँग्रेसने मध्यरात्री केले अनोखे आंदोलन  अहमदनगर | नगर सह्याद्री नगर शहरातील निकृष्ट रस्त्यांचा भांडाफोड शहर काँग्रेस कडून सुरू आहे. बुध...

शहर काँग्रेसने मध्यरात्री केले अनोखे आंदोलन 

अहमदनगर | नगर सह्याद्री

नगर शहरातील निकृष्ट रस्त्यांचा भांडाफोड शहर काँग्रेस कडून सुरू आहे. बुधवारी मध्यरात्री रात्री शहर जिल्हाध्यक्ष किरण काळे यांच्या नेतृत्वाखाली शहराच्या बाजारपेठेतील रस्त्यावर काँग्रेसने आंदोलन केले. शनी चौक ते होशिंग हॉस्पिटल दरम्यान मनपाने प्रभाग क्रमांक १२ मध्ये केलेला सिमेंटच्या नवा रस्ता अवघ्या चार-पाच महिन्यांत गायब झाला. या रस्त्यावर ‘भ्रष्टाचार्‍यांना ७० %.. रस्त्याला ३० %... ’ असे लिहीत काँग्रेसने मनपा, ठेकेदार, लोकप्रतिनिधी यांचा निषेध केला.  

शहर जिल्हाध्यक्ष किरण काळे यांच्या नेतृत्त्वाखाली झालेल्या आंदोलनात ब्लॉक काँग्रेस अध्यक्ष मनोज गुंदेचा, ओबीसी शहर काँग्रेस जिल्हाध्यक्ष संजय झिंजे, शहर जिल्हा सरचिटणीस अभिनय गायकवाड, इंजिनीअर सुजित क्षेत्रे सहभागी झाले होते. आंदोलनापूर्वी सर्वांनी प्रभू श्रीराम आणि बजरंग बली मंदिरात जात दर्शन घेतले. रस्त्याच्या कामांत ७० % टक्के कमिशन खाणे सुरू आहे. केवळ ३० % रक्कम प्रत्यक्षात रस्त्यावर खर्च केली जाते. मग हे रस्ते कसे दर्जेदार तयार होतील, असा संतप्त सवाल काळे यांनी यावेळी केला. ते म्हणाले, हा वर्दळीचा रस्ता आहे. भिंगारवाला चौक ते कोतवाली पोलीस स्टेशन ते जुन्या मनपा चौकापर्यंत रस्त्याची दुरावस्था झाली आहे.

 हा रस्ता व्हावा अशी व्यापारी, नागरिकांची मागणी आहे. मात्र काही महिन्यांपूर्वी मनपाने लोकप्रतिनिधींच्या आग्रहातून सिमेंट काँक्रीटीकरण करत शनी चौक ते होशिंग हॉस्पिटल दरम्यानचा रस्ता पूर्ण केला. त्यामुळे नागरिकांना काहीसा दिलासा मिळाला होता. मात्र हा दिलासा औट घटकेचा ठरला असून आता रस्ता गायब झाला आहे. येत्या पावसाळ्यात उरलेला रस्ता देखील वाहून जाईल. नगरकरांच्या तोंडाला भ्रष्टाचारांकडून पाने पुसली जात आहेत. शहरातील रस्त्यांची ऑनफिल्ड तपासणी करण्याचे काम काँग्रेस कार्यकर्ते करत आहेत. चार-पाच महिन्यांपूर्वी झालेला रस्ता गायब होणे, म्हणजे जनतेचा भ्रष्टाचार्‍यांवर दबाव नसल्यामुळे आणि ज्या लोकप्रतिनिधींवर यांना जाब विचारण्याची जबाबदारी आहे तेच मलिदा खाण्यामध्ये गुंतलेले असल्यामुळे लूट सुरू आहे. सत्तेत असणारा राष्ट्रवादी काँग्रेस पक्षाचाच विरोधी पक्षनेता आहे. त्यामुळे सभागृहात नागरिकांच्या वतीने भ्रष्टाचाराविरुद्ध आवाज उठवायला कुणी तयार नाही. संगनमताने सुरू असणार्‍या भ्रष्टाचाराचा भांडाफोड करण्यासाठी काँग्रेस रस्त्यावर उतरत आहे.