दिव्यांगांना प्रवाहात आणण्यासाठी काम करणार : काळे

  शहर स्थापना दिनानिमित्त काँग्रेसने दिव्यांगांचा सत्कार करत शहरवासीयांना दिल्या शुभेच्छा  अहमदनगर | नगर सह्याद्री  दिव्यांगांना अनेक अडचणीं...

 

शहर स्थापना दिनानिमित्त काँग्रेसने दिव्यांगांचा सत्कार करत शहरवासीयांना दिल्या शुभेच्छा 

अहमदनगर | नगर सह्याद्री 

दिव्यांगांना अनेक अडचणींचा सामना करावा लागतो. कुटुंबीयांना यात मोठी कसरत करावी लागते. मनपाकडून मिळणार्‍या मानधनासह राज्य व केंद्र शासनाच्या योजनांचा त्यांना लाभ मिळवून देण्यासाठी काँग्रेस प्रयत्नशील आहे. त्यांना समाजाच्या मुख्य प्रवाहात आणण्यासाठी काँग्रेस शहरात काम करणार असल्याचे काँग्रेसचे  शहर जिल्हाध्यक्ष किरण काळे यांनी सांगितले. 

शहर स्थापना दिनानिमित्त काँग्रेसकडून शिवनेरी पक्ष कार्यालयात दिव्यांगांचा सत्कार करण्यात आला. यावेळी ब्लॉक काँग्रेस अध्यक्ष मनोज गुंदेचा, अल्पसंख्यांक शहर काँग्रेस जिल्हाध्यक्ष अनिस चुडीवाला, माजी नगरसेवक तथा ओबीसी शहर काँग्रेस जिल्हाध्यक्ष संजय झिंजे, काँग्रेस अल्पसंख्यांक विभाग शहर समन्वयक सोफियान रंगरेज, महिला अपंग विभाग समन्वयक मिनाज सय्यद, मेहराज शेख, युवक काँग्रेस उपाध्यक्ष आकाश अल्हाट, काँग्रेस सामाजिक न्याय युवा विभाग शहर जिल्हाध्यक्ष प्रणव मकासरे आदी उपस्थित होते. 

काळे म्हणाले, ज्या दिव्यांगांना अपंगत्वाचे प्रमाण कमी आहे, अशांना रोजगारक्षम बनविण्याची गरज आहे. त्यामुळे स्वतःची दैनंदिन कामे ते स्वतः करू शकतील. 

दिव्यांगांसाठी काँग्रेसची हेल्पलाईन 

नगर शहर व तालुयातील दिव्यांगांच्या प्रश्नांच्या सोडवणुकीसाठी काँग्रेस सदैव तत्पर आहे. मानधन, जिल्हा शासकीय रुग्णालय, जिल्हा अपंग पुनर्वसन केंद्र, महानगरपालिका, जिल्हा परिषदसह शासकीय कार्यालयांत रखडलेली कामे आदी समस्यांसाठी दिव्यांग बांधव काँग्रेसच्या हेल्पलाईनवर चोवीस तास ३६५ दिवस केव्हाही संपर्क साधू शकतात. यासाठी काँग्रेसच्या वतीने काळे यांचा वैयक्तिक मोबाईल क्रमांक ९०२८७२५३६८ हेल्पलाईन म्हणून यावेळी दिव्यांग बांधवांसाठी जाहीर करण्यात आला आहे.