पुण्यात कंपनीत काम देण्याच्या बहाण्याने तरुणींना फसवल्याचा प्रकार

एका कंपनीत काम देण्याच्या बहाण्याने पाच जणांनी मॉडेलिंग करणाऱ्या तरुणीसह अन्य तरुणींना फसवल्याचा प्रकार पुण्यात उघडकीस आला आहे.

 

मुंबई / नगर सह्याद्री -

एका कंपनीत काम देण्याच्या बहाण्याने पाच जणांनी मॉडेलिंग करणाऱ्या तरुणीसह अन्य तरुणींना फसवल्याचा प्रकार पुण्यात उघडकीस आला आहे. याप्रकरणी पाच आरोपींविरुद्ध कोथरूड पोलिस ठाण्यात आर्थिक फसवणुकीचा गुन्हा दाखल करण्यात आल्याची माहिती पोलिसांनी गुरुवारी दिली.

पुणे शहरात गेल्या काही दिवसांपासून फसवणुकीच्या गुन्ह्यांमध्ये मोठी वाढ झाली आहे. असाच आणखी एक प्रकार समोर आला असून काम देण्याच्या बहाण्याने पाच जणांनी ४४ लाख रुपयांचा गंडा घातल्याचा प्रकार उघडकीस आला आहे.श्रद्धा चंद्रकांत अंदुरे, योगेश मदनलाल मुंदडा, जय पंकज चावजी, शुभम जयप्रकाश पगारे आणि अनिरुद्ध बिपीन रासने अशी आरोपींची नावे आहेत.

संबंधित आरोपींनी इन्स्टाग्राम आणि फेसबुकवर कोथरूड येथील क्लिक अँड ब्रश कंपनीत नोकरी देत असल्याची जाहिरात दिली. त्याच्यामार्फत आरोपींनी दररोज पाच ते सात हजार रुपये देण्याचे आश्वासन दिले. आरोपींनी सर्व मेकअप आर्टिस्ट, हेअर स्टायलिस्ट, फोटोग्राफर, मॉडेल, फॅशन डिझायनर यांच्याकडून तीन महिने आणि दोन वर्षांसाठी सबस्क्रिप्शनचे पैसे घेतले. 

त्यानंतर गुंतवणूकदारांना तात्पुरते काही पैसे देण्यात आले आणि त्यानंतर कंपनी अडचणीत असून काम बंद केल्याचे सांगण्यात आले. केलेल्या कामाचे पैसे आणि वर्गणी परत करण्याच्या बहाण्याने आरोपी वेळोवेळी पैसे न देण्याचे नवनवीन कारणे सांगून गुंतवणूकदारांची दिशाभूल करत होते.

आरोपींनी संगनमताने, अप्रामाणिकपणे त्यांच्या वैयक्तिक फायद्यासाठी संबंधित पैशाची फसवणूक केली आहे आणि तक्रारदार आणि इतर साक्षीदारांची ४४ लाख रुपयांची फसवणूक केली आहे. पोलीस या घटनेचा अधिक तपास करत आहेत.