लुटण्याचा 'असा' फंडा, लाखो रुपयाला घातला गंडा; शितपेयाची बनावट आर्डर..

चार आरोपींच्या विरोधात गुन्हा दाखल | आरोपीकडून २ लाख ३८ रूपयांचा मुद्देमाल जप्त पारनेर | नगर सह्याद्री  तालुयातील टाकळी ढोकेश्वर येथील महावी...

चार आरोपींच्या विरोधात गुन्हा दाखल | आरोपीकडून २ लाख ३८ रूपयांचा मुद्देमाल जप्त

पारनेर | नगर सह्याद्री 

तालुयातील टाकळी ढोकेश्वर येथील महावीर सुपर मार्केटच्या वतीने शीतपेयाची ऑर्डर देण्यात आली असल्याचे खोटे सांगून त्यातील निम्मे शीतपेये आमच्या पीकअप गाडीत टाकायचे आहे, अशी खोटी बतावणी करून शीतपेये परस्पर पसार करणारे ४ आरोपी जेरबंद झाले आहेत. पारनेर पोलीस ठाण्यात गुन्हा दाखल करण्यात आला असून आरोपीकडून २ लाख ३८ रूपयाचा मुद्देमाल जप्त केला आहे.

फिर्यादी वैभव प्रदीप औटी (वय २२ वर्षे, रा. कोर्ट गल्ली, ता. पारनेर) हे चालक म्हणून काम करतात. फिर्यादी माल वाहतूक करीत असतात. ३ मे २०२३ रोजी त्यांना  दीपक औटी यांनी बोलावून सांगितले की, महावीर सूपर मार्केट टाकळी ढोकेश्वर येथील शितपेयाची ऑर्डर आहे. मागणी प्रमाणे लोड करून टाकळी येथे डिलीव्हरी करून या. त्यावेळी त्यांनी वेगवेगळ्या कंपनीचे १ लाख ३२ हजार ४०० रूपयांची शितपेय चारचाकीत लोड करत टाकळी ढोकेश्वर येथे पाठवून दिले. यातील आरोपीने शासकीय रुग्णालय टाकळी ढोकेश्वर येथे आधीच पिकअप वाहन आणून सुदर्शन किराणा स्टोअर्ससमोर येऊन थांबले होते. 

आरोपी यांनी फिर्यादींचा टेम्पो अडवून महावीर सूपर शॉप मालकाने अर्धा माल पिकअपमध्ये खाली करण्यास सांगीतला आहे. उर्वरित सुपर शॉप मध्ये जावून खाली करा व पैसे महावीर शॉपमधून घेवून टाका, असे सांगीतले. फिर्यादीने विश्वास ठेवून त्यांना माल काढून दिला. महावीर सुपर शॉप येथे जावनू अर्धा माल कुठे खाली करू, असे विचारलेवर तेथील चेतन भंडारी यांनी मालाची मागणी केली नसल्याचे सांगितल्यावर फिर्यादी यांना फसवणूक झाल्याचे लक्षात आले. वैभव ओटी यांनी सर्व हकीकत त्यांचे मालक दीपक औटी यांना दिली. औटी यांना मागणी झालेल्या मोबाईल क्रमांकवर फोन केला असता तो स्विच ऑफ आला. त्यानंतर फिर्यादी यांनी टाकळी ढोकेश्वर पोलीस दूरक्षेत्र येथे फसवणूकीचा गुन्हा नोंद करण्यात आला.

पोलीस अधीक्षक अपर पोलीस अधिक्षक उपविभागीय पोलीस अधिकारी अजित पाटील, पोलीस निरीक्षक संभाजी गायकवाड यांचे सूचनेनुसार तपास सूरू करण्यात आला. त्यामध्ये घटनास्थळाचे सीसीटीव्ही फुटेज तपासले. कॉल डिटेल्स घेण्यात आले व आरोपी याचे ढोकी टोल नाका येथे सीसीटीव्ही चेक केले. टेम्पो आरोपींनी आडमार्गाने नेल्याचे निष्पन्न झाले. गोपनीय साक्षीदार व तांत्रिक तपासावरून आरोपी शेवगाव तालुयातील दीपक गणेश गुगळे असून वडुले गावाचा असल्याचे समजले. त्यास मीरी माका शिवारात अंधारात पाठलाग करून ताब्यात घेतले. त्याने गुन्हयात वापरलेली पिकअप गाडी व फसवणूक करून नेलेली शितपेय असे एकुण २ लाख ३८ हजार ९०  रूपयांचा मुद्देमाल काढून दिला. 

उर्वरित मुद्देमाल साथीदार ऋषीकेश वंजारी गंधेवाडी (ता. शेवगाव), ओमकार गुंजाळ (पूर्ण नाव पत्ता माहित नाही), जयेश संदीप खरमाळे (रा. भांडगाव, ता. पारनेर) यांनी विकल्याची कबुली दिली. तसेच पांढरी पूलावर सुमारे १ लाख रूपये किमतीचे लिवागार्ड बॅटरी व इन्व्हर्टर फसवणूक करून पळवून नेल्याचे तपासात कबुली दिली. या आरोपी विरोधात सोनई, कोतवाली, जामखेड, शेवगाव येथे गुन्ह्याची नोंद असल्याचे तपासात समोर आले. ही कामगीरी पोलीस अधीक्षक राकेश ओला, अपर पोलीस अधीक्षक प्रशांत खैरे, उपविभागीय अधिकारी अजित पाटील यांच्या मार्गदर्शनाखाली पोलीस निरिक्षक संभाजी गायकवाड, सहायक पोलीस निरिक्षक विजय ठाकुर, पोहेकॉ. संदीप गायकवाड, पोशि, मच्छींद्र खेमनर, पोशि. रविंद्र साठे, यांच्या पथकाने केली.