नरेंद मोदीचं देशवासियांना गिफ्ट; लॉन्च होणार 'हे' नाणं

नवी दिल्ली वृत्तसंस्था - पंतप्रधान नरेंद्र मोदी आणि लोकसभा अध्यक्ष ओम बिर्ला यांच्या हस्ते रविवारी २८ मे रोजी संसदेच्या नवीन इमारतीचे उद्घाट...

नवी दिल्ली वृत्तसंस्था -

पंतप्रधान नरेंद्र मोदी आणि लोकसभा अध्यक्ष ओम बिर्ला यांच्या हस्ते रविवारी २८ मे रोजी संसदेच्या नवीन इमारतीचे उद्घाटन होणार आहे. यावेळी ७५ रुपयांचे नाणे आणि स्टॅम्पचे लोकार्पण करण्यात येणार आहे. अर्थ मंत्रालयाने गुरुवारी नाण्याविषयी नोटिफिकेशन जारी केले. हे नाणे भारत सरकारच्या कोलकाता टांकसाळीत तयार होत आहे.

संसदेच्या नवीन इमारतीच्या उद्घाटन प्रक्रियेबाबत फारशी माहिती सार्वजनिक क्षेत्रात आलेली नाही. पण मिळालेल्या माहितीनुसार, नवीन इमारतीचे उद्घाटन दोन टप्प्यात होण्याची शयता आहे. उद्घाटन कार्यक्रमापूर्वीचे विधी सकाळी सुरू होतील. पूजा आणि इतर धार्मिक विधींनंतर सकाळी साडेनऊच्या सुमारास सकाळचा टप्पा संपेल, त्यानंतर दुसर्‍या टप्प्याची सुरुवात दुपारी लोकसभेच्या सभागृहात राष्ट्रगीत गायनाने होईल. यादरम्यान ७५ रुपयांचे नाणे आणि स्टॅम्प जारी करण्यात येणार आहे. 

अर्थ मंत्रालयाच्या माहितीनुसार हे नाणे ५०% चांदी, ४०% तांबे, ५% निकेल आणि ५% झिंकच्या मिसरपासून बनवले जात आहे. नाण्याच्या एका बाजूस अशोकस्तंभ असेल, ज्याच्या खाली सत्यमेव जयते लिहिलेले असेल. डावीकडे देवनागरीत भारत आणि उजवीकडे इंग्रजीत इंडिया लिहिलेले असेल. नव्या नाण्यावर रुपयाचे चिन्ह असेल आणि सिंहाच्या खाली ७५ रुपये लिहिलेले असतील. नाण्याच्या दुसर्‍या बाजूला संसद परिसराचे चित्र असेल. छायाचित्राच्या वर देवनागरीत ‘संसद संकुल’ आणि खाली इंग्रजीत ’पार्लियामेंट कॉम्प्लेस’ असे लिहिलेले असेल.