सलमान खानला पुन्हा जीवे मारण्याची धमकी

मुंबई । नगर सह्याद्री -  बॉलिवूडचा अभिनेता सलमान खानला लॉरेन्स बिश्नोई गँगकडून सतत जीवे मारण्याची धमकी दिली जात आहे. या धमकीनंतर अभिनेत्याच्...

मुंबई । नगर सह्याद्री - 

बॉलिवूडचा अभिनेता सलमान खानला लॉरेन्स बिश्नोई गँगकडून सतत जीवे मारण्याची धमकी दिली जात आहे. या धमकीनंतर अभिनेत्याच्या सुरक्षेतही वाढ करण्यात आली.  यावेळी हा धमकीचा फोन मुंबई पोलिस कक्षाला आला आहे. 30 एप्रिल रोजी सलमानला जीवे मारणार असल्याचे या धमकीत सांगण्यात आले आहे. हा धमकीचा फोन करणाऱ्या व्यक्तीला पोलिसांनी जेरबंद केले आहे. रॉकी भाई असे धमकी देणाऱ्या आरोपीचे नाव असल्याचे समोर आले आहे.

आरोपीचे नाव रॉकी भाई असल्याचे सांगितले आहे. मुंबई पोलिस कक्षात आलेल्या धमकीच्या फोननंतर मुंबई क्राइम ब्रांचने तातडीने कारवाई करत काही तासांतच आरोपीला बेड्या ठोकल्या आहे. हा तरुण अल्पवयीन असल्याची माहिती पोलिसांनी दिली आहे. राजस्थानच्या शहापूर येथून त्याला अटक करण्यात आली आहे. रॉकी भाईचा लॉरेन्स बिश्नोई गँगशी संबंध आहे का, याचा तपास मुंबई क्राइम ब्राँच करत आहे.

सलमान खानचा जवळचा सहकारी प्रशांत गुंजाळकर याला धमकीचा ई-मेल पाठवण्यात आला होता. मेल पाठवणाऱ्या तरुणाचे नाव रोहित गर्ग असल्याची माहिती समोर आली. सलमान खानच्या टीमने संशयित आरोपी रोहित गर्ग, गोल्डी ब्रार आणि लॉरेन्स बिश्नोई यांच्याविरोधात पोलिसात तक्रार दाखल केली. सलमान खानच्या टीमने दिलेल्या तक्रारीनुसार, आरोपी रोहित गर्गने ई-मेलमध्ये लिहिले की, कुख्यात गुंड गोल्डी ब्रारला सलमान खानशी बोलायचे आहे.

'गोल्डी ब्रारला तुमच्या बॉसशी (सलमान खान) बोलायचे आहे. त्याने गँगस्टर बिष्णोईची मुलाखत नक्कीच पाहिली असेल. जर सलमानने ती मुलाखत पाहिली नसेल तर त्याला ती पाहायला सांगा. जर हे प्रकरण कायमचे बंद करायचे असेल तर सलमान खानला गोल्डी ब्रारशी बोलू द्या. त्यांना समोरासमोर बोलायचे असेल तर तसे कळवा. यावेळी आम्ही तुम्हाला वेळेवर कळवले आहे. पुढच्या वेळी थेट धक्का देऊ' असा मजकूर पत्रात लिहिला आहे.

मुंबईतल्या वांद्रे पोलिसांनी या प्रकरणी कलम 506 (2), 120 (ब) आणि 34 या अन्वये प्रकरण दाखल केले आहे. तसंच धमकीचा हा मेल सलमान खानच्या सहकाऱ्याला आल्यानंतर पोलिसांनी सलमान खानच्या घराभोवतीची सुरक्षा वाढवली. मुंबई पोलिसांनी सलमान खानला Y+ सुरक्षा प्रदान केली आहे. सतत मिळणाऱ्या धमकीच्या पार्श्वभूमीवर सलमानने अलीकडेच त्याच्या सुरक्षेसाठी एक महागडी बुलेटप्रूफ कार खरेदी केली आहे.