जनतेला दिलासा : रेडीरेकनरच्या दरात अशी असेल स्थिती

महसूलमंत्री राधाकृष्ण विखे ः बांधकाम व्यावसायिकांसह सामान्यांना दिलासा अहमदनगर | नगर सह्याद्री  रेडी रेकनरच्या दरात कोणतीही वाढ न करता राज्य...

महसूलमंत्री राधाकृष्ण विखे ः बांधकाम व्यावसायिकांसह सामान्यांना दिलासा

अहमदनगर | नगर सह्याद्री 

रेडी रेकनरच्या दरात कोणतीही वाढ न करता राज्यातील जनतेला दिलासा देण्याचा निर्णय महसूल विभागाने घेतला असल्याची माहिती महसूल मंत्री राधाकृष्ण विखे पाटील यांनी दिली. 

ते म्हणाले, या जनहितार्थ निर्णयामुळे जनतेला दिलासा मिळेल. वार्षिक बाजार मूल्य दर म्हणजेच रेडीरेकनरचे दर प्रत्येक वर्षी १ एप्रिलला जाहीर करण्यात येतात. त्यानुसार स्थावर व जगंम मालमत्तेचे सरासरी दर निश्चित करण्यात येतात. यावर्षी जमीन व इमारत मिळकतींचे दरामध्ये कोणतीही वाढ करण्यात येऊ नये अशी विनंती क्रेडाई, विकसक व इतर सामान्य नागरिकांकडून राज्य शासनास  

करण्यात येत होती. या निवेदनांचा सकारात्मक विचार करुन रेडीरेकनरच्या दरात कोणतीही वाढ करण्यात आली नसल्याचे महसूल मंत्री राधाकृष्ण विखे पाटील यांनी सांगितले. येत्या आर्थिक वर्षात म्हणजेच सन २०२३-२४ च्या वार्षिक दर विवरणपत्र दरात कोणताही बदल न करता ते मागील वर्षाप्रमाणेच कायम ठेवण्यात आले आहेत. रेडीरेकनरचे दर स्थिर ठेवल्यामुळे मालमत्ता खरेदी व विक्री करणार्‍या दोघांनाही फायदा होतो.

सामान्य नागरीकांना घर खरेदी करण्यास प्रोत्साहन मिळते. तसेच बांधकाम व्यावसायिक, घरकुल विकसक, रिअल इस्टेटमध्ये काम करणारे मध्यस्थ, वकील व सल्लागार आणि स्थावर मालमत्ता धारकांच्या व्यवसायात उत्साहाचे वातावरण निर्माण होऊन खरेदी-विक्रीस चालना मिळते. त्यामुळे एकूणच अर्थव्यवस्थेला चालना मिळते. या बाबी विचारात घेऊन शासनाने सन २०२३-२४ च्या रेडीरेकनरच्या दरात कोणतीही वाढ केली नसल्याचे मंत्री विखे पाटील यांनी सांगितले.