अकोला। नगर सहयाद्री - अकोला जिल्ह्यामधून एक धक्कादायक बातमी समोर अली आहे. बार्शीटाकळी तालुक्यातील दोनद खुर्द येथील आसरा माता यात्रेतून घरी ...
अकोला। नगर सहयाद्री -
अकोला जिल्ह्यामधून एक धक्कादायक बातमी समोर अली आहे. बार्शीटाकळी तालुक्यातील दोनद खुर्द येथील आसरा माता यात्रेतून घरी परतत असताना दुचाकीला पाठीमागून येणाऱ्या ट्रकने उडवलं. यावेळी महिलेच्या अंगावरुन चाक गेल्याने तिचा जागीच मृत्यू झाला. लक्ष्मी राहुल गोपकर (वय ३२ वर्ष) असं अपघातात मृत्यू झालेल्या महिलेचं नावं आहे. या घटनेने सर्वत्र हळहळ व्यक्त केली जात आहे.
वृत्तसंस्थाच्या माहितीनुसार, आसरा माता यात्रेदरम्यान पिंजर अकोला रस्त्यावर प्रचंड गर्दी असते. या यात्रेला जिल्ह्यासह बाहेरील जिल्ह्यातील भाविकांची मोठी गर्दी उसळते. अकोला जिल्ह्यातील मुर्तीजापुर तालुक्यातल्या हातगाव येथे गोपकर कुटुंब राहतं. राहुल गोपकर, त्यांची पत्नी मुलगा आदित्य व मुलगी शिवानी हे चौघे जण काल सकाळी आपल्या दुचाकीने आसरा माता यात्रेत आसरामातेचे दर्शन घेण्यासाठी गेले होते.
दर्शनानंतर दुचाकीने चौघेही जण घरी परतीच्या प्रवासात असताना दौनद ख़ुर्द इथे त्यांचा अपघात झाला. पाठीमागून येणाऱ्या ट्रकने त्यांच्या दुचाकीला जबर धडक दिली. ही धडक इतकी जबर होती, या धडकेत राहुल यांचं दुचाकीवरील नियंत्रण सुटलं आणि दुचाकी खाली कोसळली. महिला रस्त्यावर पडल्याने ट्रकचे चाक त्यांच्या डोक्यावरुन गेलं यात लक्ष्मी यांचा जागीच मृत्यू झाला. परंतु सुदैवाने राहुल, शिवानी आणि आदित्य हे तिघेही जण थोड्या दूर अंतरावर कोसळल्याने बचावले आहेत.
अपघाताची माहिती पिंजर पोलिसांना मिळताच पोलिसांनी ट्रकचा पाठलाग करून काही अंतरावर ट्रक आणि ट्रक चालकाला ताब्यात घेतले आहे. तसेच या प्रकरणात अपघाताची नोंद देखील करण्यात आली असून पुढील तपास सुरू आहे. रस्त्यावरून वाहणारा अपघाती ट्रक रिकामा होता आणि चंद्रपूर येथील असल्याचं समजतं.
COMMENTS