छत्रपती संभाजीनगर। नगर सहयाद्री - छत्रपती संभाजीनगरमध्ये एक धक्कादायक घटना उघडकीस अली आहे. वसतिगृहातील एका विद्यार्थिनीला पेइंग गेस्ट म्हणून...
छत्रपती संभाजीनगर। नगर सहयाद्री -
छत्रपती संभाजीनगरमध्ये एक धक्कादायक घटना उघडकीस अली आहे. वसतिगृहातील एका विद्यार्थिनीला पेइंग गेस्ट म्हणून घरी राहण्यासाठी नेऊन तिच्यावर प्राध्यापकाने बलात्कार केल्याचा प्रकार समोर आला आहे. या कृत्यात त्याच्या पत्नीचाही सहभाग असल्याचे फिर्यादीत म्हटले आहे. अशोक गुरप्पा बंडगर असे प्राध्यापकचे नाव आहे. बंडगर पती-पत्नीवर बलात्काराचा गुन्हा दाखल करण्यात आला.
वृत्तसंस्थाच्या माहितीनुसार,३० वर्षीय पीडिता विद्यापीठात प्रवेश घेतल्यानंतर राहण्यासाठी शहरात आली होती. डॉ. बाबासाहेब आंबेडकर मराठवाडा विद्यापीठातील नाट्यशास्त्र विभागातील प्रा. बंडगरसोबत ओळख झाली. परंतु वसतिगृहात जागा देण्याऐवजी आरोपी प्राध्यापक तिला स्वत:च्या घरीच पेईंग गेस्ट म्हणून राहण्यास घेऊन गेला. त्यांच्या पत्नीनेही पीडितेला, “होस्टेल सुरक्षित नसतात, तू आम्हाला मुलीसारखीच आहेस,’ असे म्हणत पेइंग गेस्ट म्हणून राहण्यासाठी आग्रह केला.
मोठ्या विश्वासाने पीडिता पेइंग गेस्ट म्हणून बंडगर दांपत्याकडे राहायला लागली. जून २०२२ मध्ये बंडगरने अनेकवेळा पीडितेची छेडछाड करण्याचा प्रयत्न केला. जुलै 2022 मध्ये पहाटे हॉलमध्ये पीडिता झोपलेली असताना बंडगरने जबरदस्ती तिच्यासोबत लैंगिक अत्याचार केला. त्यानंतर पाच ते सहा वेळा त्याने जबरदस्तीने तिच्यासोबत शारीरिक संबंध ठेवले. हा प्रकार पीडितेने त्याच्या पत्नीला सांगितला.
तेव्हा तिने हे सर्व मला मान्य आहे. तू आता घर सोडून जाऊ नकोस. माझ्या पतीसोबतच लग्न कर, मला दोन मुली आहेत. आम्हाला मुलगा हवा आहे. तुझ्यापासून आम्हाला एक मुलगा हवा असल्याचेही तिने सांगितले. त्यानंतर बंडगरची पत्नीच विद्यार्थिनीला वारंवार त्याच्यासोबत बेडरूममध्ये पाठवत असल्याचे पीडितने दिलेल्या फिर्यादीत म्हटले आहे.
मुलीची प्रकृती बिघडल्याचे कळल्यानंतर पीडितेचे वडील व बहिणीने तिला गावाकडे नेले. पीडिता गावाला गेल्यानंतर मात्र बंडगर दांपत्याने वारंवार पुन्हा त्यांच्या घरी परतण्यासाठी धमकावणे सुरू केले. त्याप्रकरणी त्यांच्यावर तेथील स्थानिक पोलिस ठाण्यात गुन्हा दाखल करण्यात आला.या संतापजनक प्रकारामुळे छत्रपती संभाजीनगरमध्ये खळबळ उडाली आहे.
COMMENTS