नवीन घर देतो म्हणून पावणे पाच लाखांना गंडा

  अहमदनगर | नगर सह्याद्री- नवीन घर खरेदीच्या शोधात असलेल्या येथील महापालिकेच्या सफाई कामगाराची चार लाख ७१ हजाराची फसवणूक झाली आहे. राजू सदाश...

 

अहमदनगर | नगर सह्याद्री-

नवीन घर खरेदीच्या शोधात असलेल्या येथील महापालिकेच्या सफाई कामगाराची चार लाख ७१ हजाराची फसवणूक झाली आहे. राजू सदाशिव अवघडे (वय ५३ रा. सिद्धार्थनगर) असे फसवणूक झालेल्याचे नाव आहे. त्यांनी तोफखाना पोलीस ठाण्यात फिर्याद दिली आहे.

फिर्यादीवरून भीमराज रामभाऊ सरोदे (रा. बोल्हेगाव, मुळ रा. देवळाली) याच्याविरूद्ध भादंवि कलम ४०६, ४२० प्रमाणे गुन्हा दाखल करण्यात आला आहे. राजू अवघडे यांना नवीन घर खरेदी करायचे असल्याने ते घर शोधत होते. त्यांची भेट भीमराज सरोदे याच्यासोबत झाली. त्याने राजू अवघडे यांचा विश्वास संपादन केला. तुम्हाला नवीन घर देतो, असे म्हणून त्यांच्याकडून चेकव्दारे २७ जानेवारी २०२०, १८ फेब्रुवारी २०२०, २५ नोव्हेंबर २०२०, २ फेब्रुवारी २०२१ व १५ सप्टेंबर २०२१ अशा तारखेनुसार एकुण चार लाख ७१ हजार रूपये घेतले. दरम्यान राजू अवघडे यांना अद्यापपर्यंत नवीन घर दिले नाही व घेतलेले पैसेही परत दिले नाही. सरोदे याने ते घर दुसर्‍या व्यक्तीला विक्री करून अवघडे यांची फसवणूक केल्याचे फिर्यादीत म्हटले आहे.

फसवणूक झाल्याचे लक्षात आल्यानंतर अवघडे यांनी पोलीस अधीक्षक यांच्या नावाने तक्रार अर्ज दाखल केला होता. त्या अर्जाची चौकशी होवून सोमवारी ३ एप्रिलला गुन्हा दाखल करण्यात आला आहे. पोलीस अंमलदार एस. पी. गर्जे तपास करीत आहेत.