धीरेंद्र शास्त्रीचा दरबार काँग्रेस उधळून लावेल; किरण काळे

अहमदनगर | नगर सह्याद्री संतश्रेष्ठ तुकाराम महाराजांबद्दल आधी अपशब्द वापरणार्‍या बागेश्वर धामच्या धीरेंद्र शास्त्रीने आता साईबाबांबद्दल देखील...

अहमदनगर | नगर सह्याद्री

संतश्रेष्ठ तुकाराम महाराजांबद्दल आधी अपशब्द वापरणार्‍या बागेश्वर धामच्या धीरेंद्र शास्त्रीने आता साईबाबांबद्दल देखील बेताल वक्तव्य केले आहे. याचे तीव्र पडसाद उमटत आहेत. अहमदनगर शहर काँग्रेसने याचा तीव्र निषेध केला असून शहरातील तथाकथित कार्यसम्राट लोकप्रतिनिधी या भोंदू बाबाला शहरामध्ये दरबार लावण्यासाठी आणण्याच्या प्रयत्नात असून या भोंदू बाबाला नगरमध्ये आणल्यास काँग्रेस त्यांचा दरबार उधळून लावेल, असा इशारा शहर जिल्हाध्यक्ष किरण काळे यांनी दिला आहे.

काँग्रेसने याबाबत जिल्हा पोलीस अधीक्षक राकेश ओला यांना पत्र पाठवले आहे. त्यात म्हटले आहे की, धीरेंद्र शास्त्री यांनी बेताल वक्तव्यांमधून धार्मिक भावना दुखविल्या आहेत. संत तुकाराम महाराज हिंदू धर्मीय होते. साईबाबांना सर्व धर्मीयांमध्ये मानणारा मोठा वर्ग आहे. जगात श्रेष्ठ मानल्या जाणार्‍या महनीय संतांच्या अवमानाची सुपारी त्यांनी घेतली आहे. यामुळे संत परंपरेचा अवमान झाला आहे. संत तुकारामां बद्दल अपशब्द वापरणार्‍या धीरेंद्र शास्त्रीचा विशेषतः हिंदू तरुणांकडून, माता-भगिनींकडून मोठ्या प्रमाणावर निषेध होत आहे. काँग्रेस देखील या वक्तव्यांचा तीव्र निषेध करीत आहे. साईबाबां बद्दलच्या बेताल वक्तव्यामुळे सर्व धर्मीयांमध्ये देखील संताप निर्माण झाला आहे.

काळे म्हणाले की, या महाशयांचा दरबार लावण्यासाठी लोकप्रतिनिधी प्रयत्नशील आहेत. या भोंदू महाराजाला शहरात आणल्यास काँग्रेस कार्यकर्ते त्यांचा दरबार उधळून लावतील. कोणी त्यांना नगर शहरात आणण्याचा प्रयत्न केल्यास त्यांच्या दरबारास पोलीसांनी परवानगी देऊ नये. त्यांना शहरामध्ये येण्यास बंदी घालावी असे काँग्रेसने म्हटले आहे.  सर्व धर्मीय समाजांमध्ये सलोख्याचे, बंधू भावाचे वातावरण आणि शांतता टिकविण्यासाठी काँग्रेस काम करत आहे. अशांना शहरामध्ये प्रवेश देऊन कायदा सुव्यवस्थेचा प्रश्न निर्माण होणार नाही याची दक्षता घ्यावी, अशी मागणी प्रशासनाकडे काँग्रेसने केली आहे.

दरम्यान, धीरेंद्र शास्त्रीने तुकाराम महाराजांचा अपमान केला आहे असे म्हणत, आयुर्वेद महाविद्यालयासमोरील गुणे शास्त्री आयुर्वेद चौकाचे नाव बदलून संतश्रेष्ठ तुकाराम महाराज चौक असे नाव द्यावे, अशी मागणी काँग्रेसच्या वतीने किरण काळे यांनी केली आहे.