अभिनेते सतीश कौशिक यांचे पोस्टमार्टम का झाले? नेमके मृत्यूचे कारण काय होते...

दिल्लीतील दीनदयाल रुग्णालयात ६६ वर्षीय सतीश कौशिक यांच्या मृतदेहाचे पोस्टमार्टम सुरू होते, ते पूर्ण झाले आहे.

मुंबई / नगर सह्याद्री - 

बॉलीवूड अभिनेते, निर्माता, दिग्दर्शक आणि पटकथा लेखक सतीश कौशिक यांचे काल रात्री २.३० सुमारास गुरुग्राममधील फोर्टिस रुग्णालयात निधन झाले. दिल्लीतील दीनदयाल रुग्णालयात ६६ वर्षीय सतीश कौशिक यांच्या मृतदेहाचे पोस्टमार्टम सुरू होते, ते पूर्ण झाले आहे. हृदयविकाराच्या झटक्याने त्यांचा मृत्यू झाल्याचे सांगितले जात आहे, परंतु फोर्टिसच्या डॉक्टरांना याबद्दल शंका होती, त्यामुळे त्यांच्या मृतदेहाचे पोस्टमॉर्टम करण्यात आले. डॉक्टरांनी दुपारी साडेबाराच्या सुमारास त्यांचा मृतदेह नातेवाईकांच्या ताब्यात दिला. सतीश कौशिक यांचे पार्थिव विमानाने मुंबईत आणले.

सतीश कौशिक यांचा मित्र प्रतीक आनंदने सांगितले की, सतीश कौशिक होळी खेळण्यासाठी दिल्लीत आले होते. रात्रीपर्यंत त्यांची प्रकृती ठीक होती. रात्री उशिरा त्यांना अचानक छातीत दुखू लागल्यानंतर त्यांना फोर्टिस रुग्णालयात नेण्यात आले. हॉस्पिटलच्या गेटवरच त्यांचा मृत्यू झाला. सतीशच्या मृत्यूचे कारण सडन कार्डियाक अरेस्ट (अचानक हृदयविकाराचा झटका) आहे. मात्र, सविस्तर अहवाल येणे बाकी आहे. 

सतीश कौशिक यांच्या मृतदेहाचे शवविच्छेदन सुमारे तासभर सुरू होते. सकाळी अकराच्या सुमारास शवविच्छेदनाला सुरुवात झाली. त्यांच्या शरीरावर कोणत्याही प्रकारच्या जखमेचे निशाण नसल्याचे सांगण्यात येत आहे. त्यांनी दारूही पिली नसल्याचे बोलले जात आहे. 

सतीश कौशिक यांच्या व्यवस्थापकाने सांगितले की, ते बुधवारी सकाळी १०:०० वाजता होळी साजरी करण्यासाठी दिल्लीतील द्वारका सेक्टर २३ येथील पुष्पांजली येथे आले होते. होळी साजरी केल्यानंतर त्यांनी येथेच मुक्काम केला. रात्री १२:१० च्या सुमारास त्यांनी मॅनेजरला फोन करून छातीत दुखत असल्याचे सांगितले. मॅनेजरने त्यांना तात्काळ फोर्टिस रुग्णालयात नेले, तिथे गेटवरच त्यांचा मृत्यू झाला. यानंतर नातेवाईकांनी कापशेरा पोलीस ठाण्याच्या पोलिसांना माहिती दिली. पोलिसांनी त्यांचा मृतदेह दीनदयाल रुग्णालयात आणून शवविच्छेदन केले.

पोलिसांसोबत आलेल्या त्यांच्या सहकाऱ्यांनी सांगितले की, हृदयविकाराचा झटका आल्याने पोलिसांकडून शवविच्छेदन केले जात आहे. त्यांच्यासोबत काही गैरकृत्य झाले आहे की नाही हे जाणून घेण्यासाठी पोलीस शवविच्छेदन करत आहेत. त्यांच्या प्रकृतीमुळे हृदयविकाराचा झटका येण्याची शक्यता कमी असल्याचे तपासणीदरम्यान डॉक्टरांना दिसून आले. यामुळेच फोर्टिसच्या डॉक्टरांनी दिल्ली पोलिसांना सतीश कौशिक यांच्या मृत्यूची माहिती दिली आणि मृतदेहाचे पोस्टमार्टम करण्यास सांगितले.

डॉक्टरांच्या म्हणण्यानुसार, सतीश यांना पाहून ते कुठूनतरी पडले असावे, असे वाटत होते, अशावेळी मृतदेहाचे शवविच्छेदन होणे गरजेचे आहे. हृदयविकाराच्या झटक्याने मृत्यू झाल्याची पुष्टी झाली असती तर पोस्टमॉर्टम झाले नसते.

सतीश कौशिक यांचा जन्म १३ एप्रिल १९५६ रोजी हरियाणातील महेंद्रगड येथे झाला. १९७२ मध्ये त्यांनी दिल्लीच्या किरोडी मल कॉलेजमधून पदवी प्राप्त केली. तेथे असताना त्यांनी नॅशनल स्कूल ऑफ ड्रामा आणि एफटीआयआयमध्येही शिक्षण घेतले.