कुटुंबातील सदस्य सोडून गेल्याने व्यक्तीने केला शेजाऱ्यांचा खून!

दक्षिण मुंबईतील एका निवासी इमारतीत शुक्रवारी एका ५४ वर्षीय व्यक्तीने शेजाऱ्यांवर चाकूने वार केला, त्यात दोघांचा मृत्यू झाला आणि तीन जण जखमी झाले.

मुंबई / नगर सह्याद्री - 

दक्षिण मुंबईतील एका निवासी इमारतीत शुक्रवारी एका ५४ वर्षीय व्यक्तीने शेजाऱ्यांवर चाकूने वार केला, त्यात दोघांचा मृत्यू झाला आणि तीन जण जखमी झाले. ही घटना ग्रँट रोडवरील पार्वती मॅन्शन येथे दुपारी साडेतीन वाजता घडली. आरोपीला अटक करण्यात आली असून चेतन गाला असे त्याचे नाव आहे.

अधिकाऱ्याने सांगितले की, आरोपीची पत्नी आणि मुले त्याला सोडून गेली आहेत. त्यांना शेजाऱ्यांनी भडकावल्याचा संशय होता. तेव्हापासून तो मानसिकदृष्ट्या अस्वस्थ होता. शुक्रवारी शेजाऱ्यांना पाहून त्याचा संयम सुटला. त्याच्या घरी जाऊन त्याने चाकू घेतला आणि शेजारच्या कुटुंबातील पाच जणांवर हल्ला केला. जखमींना गिरगाव येथील खासगी रुग्णालयात नेण्यात आले, तेथे उपचारादरम्यान जयेंद्र आणि नीला मिस्त्री या दाम्पत्याचा मृत्यू झाला.

घटनेनंतर आरोपीने स्वतःला इमारतीतील एका खोलीत कोंडून घेतले. पोलीस घटनास्थळी पोहोचल्यावर त्याने बाहेर येण्यास नकार दिला, मात्र त्यांनी दरवाजा तोडून त्याला बाहेर काढले. पोलिसांनी त्याला ताब्यात घेतले आणि हल्ल्यात वापरलेला चाकूही जप्त केला. त्याच्या कुटुंबीयांनी त्याला सोडून दिल्याने तो व्यथित झाल्याचे अधिकाऱ्यांना सांगताना त्याने गुन्हा कबूल केला. तो मानसिकदृष्ट्या अस्वस्थ असला तरी त्याच्यावर कोणतेही वैद्यकीय उपचार होत नव्हते, असे अधिकाऱ्याने सांगितले.

भारतीय दंड संहितेच्या कलम ३०२ (हत्या) आणि ३०७ (हत्येचा प्रयत्न) अंतर्गत प्रथम माहिती अहवाल (एफआयआर) डीबी मार्ग पोलिस ठाण्यात नोंदवण्यात आला आणि तपास सुरू आहे, असे अधिकाऱ्याने सांगितले.