राज्यात सध्या ‘मुका घ्या मुका’ सिनेमा सुरू ; खा. संजय राऊत

नवी दिल्ली। नगर सह्याद्री -  राज्यात सध्या ‘मुका घ्या मुका’ सिनेमा सुरू आहे. दादा कोंडके यांचा ‘मुका घ्या मुका’ सिनेमा खूप गाजला होता. पण, ‘...

नवी दिल्ली। नगर सह्याद्री -

 राज्यात सध्या ‘मुका घ्या मुका’ सिनेमा सुरू आहे. दादा कोंडके यांचा ‘मुका घ्या मुका’ सिनेमा खूप गाजला होता. पण, ‘मुका घ्या मुका’ प्रकरणात शिवसेनेच्या कार्यकर्त्यांना अटक का केली जात आहे? त्यांचा संबंध काय? हा सत्ता आणि पोलीस यंत्रणेचा गैरवापर आहे, अशी टीका खा. संजय राऊत यांनी केली.

गेल्या काही दिवसांपासून शिवसेना नेत्या शीतल म्हात्रे आणि आमदार प्रकाश सुर्वे यांच्या व्हिडीओवरून बराच गदारोळ सुरू आहे. या प्रकरणी ठाकरे गटाच्या कार्यकर्त्यांना अटक करण्यात आली आहे. यावरून आता खासदार राऊत यांनी शिंदे गटाला इशारा दिला आहे. हा तुमच्या गटातील अंतर्गत वाद आहे, त्यात शिवसेनेला लक्ष्य करू नका, असे त्यांनी म्हटले आहे. ते म्हणाले, ठाकरे गटाच्या कार्यकर्त्यांवर गंभीर कलम दाखल करण्यात येत आहे. आम्ही सांगितले होते का मुका घ्यायला? मुळात तो व्हिडीओ खरा की खोटा हे आधी समोर येऊ द्या. मॉर्फींगचा विषय नंतर येईल. 

मला असंख्य कार्यकर्ते आणि त्यांच्या कुटुंबियांचे फोन येत आहेत. आमच्या घरी आणि कार्यालयात पोलीस आले. हा काय प्रकार चालू आहे. मुळात तो व्हिडीओ संबंधित आमदाराच्या मुलाने शेअर केला आहे. त्याला अटक केली का? ही तुमच्या गटातील अंतर्गत भांडणे असतील, तर ती तुम्ही मिटवा. याप्रकरणात प्रकाश सुर्वेंनी समोर आले पाहिजे. मुका घेणारे पहिले गुन्हेगार ते आहेत. सार्वजनिक ठिकाणी अश्लील वर्तन करत असाल, तर पहिला गुन्हा त्यांच्यावर दाखल केला पाहिजे, अशी मागणी खा. राऊत यांनी केली.