पक्षाच्या विरोधात वक्तव्य करणार्‍यांवर कारवाईचे प्रदेश काँग्रेसचे निर्देश

अहमदनगर | नगर सह्याद्री जिल्हा व ब्लॉक स्तरावरील नेते अनेक वेळा प्रसार माध्यमांसमोर वरिष्ठ नेत्यांच्या व पक्षाच्या विरोधात वक्तव्य करतात.बॅन...

अहमदनगर | नगर सह्याद्री

जिल्हा व ब्लॉक स्तरावरील नेते अनेक वेळा प्रसार माध्यमांसमोर वरिष्ठ नेत्यांच्या व पक्षाच्या विरोधात वक्तव्य करतात.बॅनर, पोस्टर बाबतही राजशिष्ठाचार पाळत नाहीत. या बाबी अतिशय गंभीर स्वरूपाच्या असून पक्षविरोधी भूमिका घेणार्‍या कार्यकर्त्यांवर वेळीच पक्ष शिस्तभंगाची कडक कारवाई करण्यासाठी प्रदेशाध्यक्ष आ.नाना पटोलेंनी शहर काँग्रेस जिल्हाध्यक्षांच्या अध्यक्षतेखाली सात सदस्यीय शिस्तभंग समिती गठित करण्याचे लेखी निर्देश प्रदेश काँग्रेसच्या वतीने दिले आहेत. 

पक्षाच्या या कडक भूमिकेमुळे पक्ष विरोधी कारवाया करणार्‍या अनेकांचे धाबे मात्र चांगलेच दणाणले आहेत.प्रदेशाध्यक्ष आ.पटोले, विधिमंडळ पक्षनेते आ.बाळासाहेब थोरातांच्या मार्गदर्शनाखाली समिती काम करणार आहे. शहर जिल्हा काँग्रेसचे अध्यक्ष या समितीचे पदसिद्ध अध्यक्ष असून पक्षाच्या आदेशानुसार अध्यक्ष किरण काळेंच्या अध्यक्षतेखाली समिती गठीत करण्यात आली आहे. यामध्ये सात सदस्यांचा समावेश करण्यात आला आहे. सदस्य म्हणून ब्लॉक अध्यक्ष मनोज गुंदेचा, मनपा माजी विरोधी पक्षनेते दशरथ शिंदे, अल्पसंख्यांक अध्यक्ष अनिस चुडीवाला, ओबीसी अध्यक्ष संजय झिंजे यांना स्थान देण्यात आले आहे. यासह शहर जिल्ह्याचे प्रभारी, सहप्रभारींचा मानद सदस्य म्हणून समावेश आहे.प्रदेश काँग्रेसने म्हटले आहे की, पक्षविरोधी भूमिका घेणार्‍या कार्यकर्त्यांवर वेळीच योग्य ती कारवाई न झाल्यास पक्षाचे फार मोठे नुकसान होऊ शकते. स्थानिक पातळीवरील निवडणुकांमध्ये याचा फटका बसतो.पक्षात राहून पक्षाचेच नुकसान होईल अशा प्रकारे पक्षाच्या विरोधात कामे करणार्‍यांची कृत्ये प्रांताध्यक्षांनी अतिशय गांभीर्याने घेतली असून याकरिता शिस्तभंग समिती गठीत करण्यात आली आहे.