खा. विखे पाटील जेंव्हा मुंबईत बंद गाडीला चक्क धक्का मारतात...

अहमदनगर | नगर सह्याद्री- आपल्या मतदारसंघात प्रवास करताना रस्त्यात अडचणीत सापडलेल्या व्यक्तींच्या मदतीला लोकप्रतिनिधी धावून गेल्याचे अनेकदा प...

अहमदनगर | नगर सह्याद्री-

आपल्या मतदारसंघात प्रवास करताना रस्त्यात अडचणीत सापडलेल्या व्यक्तींच्या मदतीला लोकप्रतिनिधी धावून गेल्याचे अनेकदा पहायला मिळते. मात्र, मुंबईसारख्या शहरात बाहेरच्या मतदारसंघातील लोकप्रतिनिधीने धावून जाणे विरळच. असाच प्रकार काल रात्री मुंबईत घडला. अहमदनगरचे खासदार डॉ. सुजय विखे पाटील रात्री मुंबईत ज्येष्ठ नागरिकांच्या एका गाडीला धक्का मारताना दिसले. कल्याणमधील एका अभियंत्याने हे दृष्य टिपून सोशल मीडियात पोस्ट केले आहे.

केतन भोई या कल्याणमध्ये राहणार्‍या अभियंत्याने ही पोस्ट केली आहे. भोई यांचे शिक्षण नगरच्या विखे पाटील अभियांत्रिक महाविद्यालयात झाले आहे. त्यामुळे त्यांनी खासदार डॉ. विखे पाटील यांना ओळखले. भोई पोस्टमध्ये म्हणतात, ऑफिस संपल्यानंतर कॅबने घरी जात असताना अंधेरी येथे तिघेजण एका गाडीला धक्का देताना दिसले. मुंबईत असे प्रसंग फार कमी वेळा दिसतात. त्यामुळे कुतूहलाने बघत होतो.  तेवढ्यात लक्षात आले की अरे यात मध्यभागी तर नगरचे खासदार डॉ. सुजय विखे पाटील आहेत. पटकन फोटो काढायचा प्रयत्न केला पण नीट फोटो घेता आला नाही. कुठलाही बडेजाव न करता नगरच्या बाहेर स्वतः रस्त्यावर उतरून एका अनोळखी व्यक्तीला मदत करणारे नगरचे खासदार आहेत, हे बघून अभिमान वाटला. 

खासदार डॉ. विखे पाटील काल दिल्लीला जाण्यासाठी मुंबईत विमानतळावर निघाले होते. रस्त्यात एका ज्येष्ठ नागरिक दाम्पत्याची गाडी बंद पडली होती. रात्रीची वेळ असल्याने मदतीला कोणीही नव्हते. ते दोघेच प्रयत्न करीत असले तरी त्यांना शय होत नव्हते. हे पाहून खासदार डॉ. विखे पाटील यांनी आपले वाहन थांबविले. त्यांच्यासोबत मोजके सहकारी होते. त्यामुळे ते स्वत: खाली उतरले आणि ज्येष्ठ नागरिकांच्या गाडीला धक्का मारून त्यांची मदत केली. विखे पाटील यांनी नगर जिल्ह्यात केंद्र सरकारच्या राष्ट्रीय वयोश्री योजनेतून ज्येष्ठ नागरिकांना आवश्यक साहित्याचे मोठ्या प्रमाणात वाटप केले आहे. या योजनेतील सर्वाधिक खर्च आणि लाभाधारक नगर जिल्ह्यात आहेत. याशिवाय ज्येष्ठ नागरिकांसाठी आरोग्य शिबिरे, मेळावे आणि दौर्‍या वेळीही ज्येष्ठ नागरिकांच्या भेटी यातून खासदार विखे पाटील यांची ज्येष्ठ नागरिकांप्रती आस्था दिसून येते. काल रात्री मुंबईच्या रस्त्यावर ती पुन्हा एकदा दिसून आली.