जिल्हा बँकेत सातशे कर्मचार्‍यांची भरती

  अहमदनगर | नगर सह्याद्री- अहमदनगर जिल्हा बँकेवर दोनदा माझ्यासारख्या सर्वसामान्य माणसाला चेअरमनपदाची संधी मिळाली. मी बँकेच्या निवडणुकीत ज्या...

 

अहमदनगर | नगर सह्याद्री-

अहमदनगर जिल्हा बँकेवर दोनदा माझ्यासारख्या सर्वसामान्य माणसाला चेअरमनपदाची संधी मिळाली. मी बँकेच्या निवडणुकीत ज्या पॅनेलमधून निवडून आलो होतो, त्यांनी अध्यक्षपदाच्या निवडणुकीत विश्वासात घेतले नसल्यामुळे बँकेची चेअरमनपदाची निवडणूक झाली. विश्वासात घेतले असते तर ही निवडणूक बिनविरोध झाली असती. यापुढे जिल्हा बँकेत राजकारण विरहित कामकाज होईल, लवकरच रिक्त जागांवरही भरती होईल, असे जिल्हा बँकेच्या अध्यक्षपदाचा पदभार स्वीकारल्यानंतर माजी मंत्री भाजप नेते शिवाजी कर्डिले यांनी सांगितले. अहमदनगर जिल्हा मध्यवर्ती सहकारी बँकेच्या अध्यक्षपदाचा पदभार कर्डिले यांनी मंगळवारी स्वीकारला. 

कर्डिले म्हणाले, या आधुनिक तंत्राच्या युगामध्ये बँकिंग क्षेत्रामध्ये नॅशनलाईज बँकेचे आव्हान उभे आहेत. ई-बँकिंग सेवा ठेवीदार, कर्जदार व खातेदारांना देण्यासाठी बँक कटिबद्ध आहे. बँकेचे कामकाज सुरळीत चालण्यासाठी लवकरच सातशे कर्मचार्‍यांची भरती होणार आहे. त्यानंतर उर्वरित पाचशे कर्मचार्‍यांचीही भरती केली जाणार आहे. या भरती प्रक्रियेमध्ये जिल्ह्यातील उमेदवारांना संधी देण्याचे काम केले जाईल. राहुरी सहकारी साखर कारखाना चालू करण्यासाठी पुढाकार घेतला जाईल. 

गडाख, घुलेंशी चर्चा

जिल्हा बँकेच्या अध्यक्षपदाची निवडणूक झाल्यानंतर मी ज्येष्ठ नेते यशवंतराव गडाख यांची भेट घेतली. तसेच सर्व संचालक मंडळातील सदस्यांची फोनवरून चर्चा केली. माजी आमदार चंद्रशेखर घुले पाटील यांच्याशी फोनवरून चर्चा झाली आहे. सर्वांना बरोबर घेऊनच बँकेचा कारभार केला जाईल, असे शिवाजी कर्डिले म्हणाले.

कर्डिले म्हणाले, राज्याचे उपमुख्यमंत्री देवेंद्र फडणवीस व जिल्ह्याचे पालकमंत्री राधाकृष्ण विखे पाटील व खा. सुजय विखे पाटील यांच्या मार्गदर्शनाखाली निवडणूक पार पडली. संचालक मंडळाने माझ्यासारख्या सर्वसामान्य माणसाला चेअरमनपदाची संधी दिली. या माध्यमातून शेतकरी, कारखानदार, व्यवसायिक व बचत गट यांना मदत केली जाईल. आज सहकार महर्षी भाऊसाहेब थोरात यांच्या पुण्यतिथीनिमित्त पदभार स्वीकारला आहे. याच बरोबर बँकेचे संचालक, माजी संचालक, जिल्ह्यातील साखर कारखान्यांचे अध्यक्ष, उपाध्यक्ष व संचालक यांचा सत्कार करण्यात आला आहे. बँकेची राजकारण विरहित सुरू असलेली परंपरा सुरू राहील.    

यावेळी बँकेचे संचालक अण्णासाहेब म्हस्के, सीताराम गायकर, माजी आमदार भानुदास मुरकुटे, प्रशांत गायकवाड, संचालिका अनुराधा नागवडे, मीनाक्षीताई पठारे, अंबादास पिसाळ, अमित भाकरे, अमोल राळेभात, संपत म्हस्के, सुरेश पठारे, बाळासाहेब भोसले, प्रेमाकाका भोईटे, ईश्वरराव कदम, शंकर राजळे, सुभाष पाटील, रावसाहेब पाटील शेळके, रामभाऊ लिपटे, सुरेश साळुंखे, दत्तात्रय पानसरे, रावसाहेब म्हस्के, राजेंद्र नागवडे, अशोक देशमुख, डीडीआर गणेश पुरी, रामसिंग काळे, वंदनाताई पवार, तुषार पवार आदी उपस्थित होते.