अजित पवारांनी वडेट्टीवारांना सुनावले

पुणे पोटनिवडणुकीवरून केलेले वक्तव्य आले अंगलट पुणे | नगर सह्याद्री- भाजपा नेते गिरीश बापट यांच्या निधनानंतर पुणे लोकसभेची पोटनिवडणूक लढविणार...

पुणे पोटनिवडणुकीवरून केलेले वक्तव्य आले अंगलट

पुणे | नगर सह्याद्री-

भाजपा नेते गिरीश बापट यांच्या निधनानंतर पुणे लोकसभेची पोटनिवडणूक लढविणार असल्याचे वक्तव्य काँग्रेस नेते विजय वडेट्टीवार यांनी केल्यानंतर विरोधी पक्षनेते अजित पवार यांनी त्यांना ‘माणुसकी नावाचा प्रकार आहे की नाही’, अशा शब्दात सुनावले आहे.

भाजपचे खासदार गिरीश बापट यांच्या निधनामुळे पुणे लोकसभेची जागा रिक्त झाली आहे. या जागेवर आता पोटनिवडणूक होण्याची शयता आहे. काँग्रेस नेते विजय वडेट्टीवार यांनी ही जागा महाविकास आघाडी लढवेन, अशा आशयाचे विधान केल्याने राजकीय वर्तुळात विविध चर्चा रंगू लागल्या आहेत. त्यांच्या या विधानावर अजित पवार चांगलेच संतप्त झाले. एका वाहिनीला मुलाखत देता विजय वडेट्टीवार म्हणाले, आमची आघाडी ठरलेली आहे आणि त्या माध्यमातून आम्ही पुणे लोकसभेची पोटनिवडणूक लढवणार आहोत. भाजपाने यापूर्वी झालेल्या पोटनिवडणुकीत अनेकदा उमेदवार दिले आहेत. त्यामुळेच आता ज्या ठिकाणी पोटनिवडणूक होईल, ती पोटनिवडणूक महाविकास आघाडी लढवेन.

विजय वडेट्टीवार यांच्या विधानानंतर पुण्यात पत्रकारांशी बोलताना अजित पवार यांनी त्यांना चांगलेच सुनावले आहे. पवार म्हणाले, लगेच कोणी गुडघ्याला बाशिंग बांधायची गरज नाही. गिरीश बापट यांच्या निधनाला केवळ तीन दिवस झाले आहेत. घाई करायची काय गरज आहे? माणुसकी नावाचा प्रकार आहे की नाही. महाराष्ट्राच्या काही परंपरा आहेत. अशी विधानं केली तर महाविकास आघाडीला जनाची नाही, पण मनाची लाज वाटते की नाही, असे लोक म्हणतील. 

यावेळी त्यांनी छत्रपती संभाजीनगरमधील राड्यावरही प्रतिक्रिया दिली.छत्रपती संभाजीनगरमधील घटना दुर्दैवी आहे. माझे तेथील नागरिकांना सांगणे आहे, की कोणी जर तुमची माथी भडकवण्याचा प्रयत्न करत असेल, तर त्याला थारा देऊ नका. तसेच महाविकास आघाडीच्या सभेपूर्वी तेथील परिस्थिती पूर्वपदावर आणावी. सभेदरम्यान संभाजीनगरमधील वातावरण बिघडेल, असे विधान कोणी करू नये, असे आवाहनही त्यांनी महाविकास आघाडीच्या नेत्यांना केले.