नाशिकमध्ये सातपुरात दिवसाढवळ्या तरुणावर गोळीबार

नाशिक । नगर सह्याद्री -  नाशिकमध्ये दिवसेंदिवस गुन्हेगारी वाढताना दिसत आहे. नाशिकच्या सातपूर येथील कार्बन नाका परिसरात असलेल्या म्हसोबा मंदि...

नाशिक । नगर सह्याद्री - 

नाशिकमध्ये दिवसेंदिवस गुन्हेगारी वाढताना दिसत आहे. नाशिकच्या सातपूर येथील कार्बन नाका परिसरात असलेल्या म्हसोबा मंदिराजवळ एका तरुणावर जीवघेणा हल्ला झाल्याची घटना घडली आहे. रविवारी दुपारी ही घटना घडली आहे. या घटनेने परिसरात एकच खळबळ उडाली आहे.  जुन्या वादातून तिघांनी तरुणावर गोळीबार तसेच कोयत्याने वार केल्याची घटना घडली आहे.

यानंतर मारेकऱ्यांनी आपले वाहन घटनास्थळी सोडून कामगाराला धाक दाखवत त्याच्या दुचाकीने पळ काढला आहे. ही सिनेस्टाईल घटना रविवारी दुपारी घडली आहे. या घटनेनंतर सातपूर परिसरात एकच खळबळ उडाली आहे.

रविवारी दुपारी तपन जाधव आपल्या चारचाकीमधून प्रवास करत असताना कार्बन नाका परिसरात आरोपी आशिष जाधव आपल्या २ साथीदारांसह वाहनातून येत तपनच्या गाडीला धडक दिली आहे. यानंतर गाडीखाली उतरत त्याच्यावर कोयत्याने वार केले यासह गोळीबार केला आहे. तिघांनी मिळून केलेल्या या हल्ल्यात तपन जाधव गंभीररित्या जखमी झाले असून त्यांच्यावर उपचार सुरु आहे.

घटनेनंतर धडक बसल्याने आरोपींची गाडी बंद पडली होती. यामुळे त्या मार्गावरुन जाण्याऱ्य़ा एका कामगाराला आरोपींनी थांबवले आहे. बंदूक अन् कोयत्याचा धाक दाखवत त्या कामगाराची दुचाकी घेऊन आरोपींनी घटनस्थळावरुन पळ काढला.या घटनेमुळे परिसरात राहणाऱ्या नागरिकांमध्ये प्रचंड दहशत निर्माण झाली आहे.

नाशिक शहरातील वाढती गुन्हेगारी रोखण्याचे आव्हान पोलिसांपुढे उभे राहीले आहे. घटनेची माहिती मिळताच शहर गुन्हेशाखा, सातपूर पोलिसांसह वरिष्ठ अधिकाऱ्यांनी घटनास्थळी धाव घेतली आहे. सदर घटनेचा पुढील तपास पोलीस करत आहे.