पुणे / नगर सहयाद्री - कॉलेजवयीन युवकांमध्ये जर या वयात वाईट संगत लागली, तर त्याचे काय दुष्परिणाम होऊ शकतात, हे पुण्यातील घटनेवरुन समोर आलं ...
पुणे / नगर सहयाद्री -
कॉलेजवयीन युवकांमध्ये जर या वयात वाईट संगत लागली, तर त्याचे काय दुष्परिणाम होऊ शकतात, हे पुण्यातील घटनेवरुन समोर आलं आहे. मैत्रिणीने अमली पदार्थांचे सेवन करण्यास भाग पाडल्याने; तसेच मित्राने संशय घेऊन मारहाण केल्याने एका महाविद्यालयीन युवतीने गळफास घेऊन आत्महत्या केल्याची घटना उघडकीस आली आहे. युवतीने आत्महत्या करण्यापूर्वी लिहिलेल्या चिठ्ठीतून आत्महत्येमागचे कारण समोर आले आहे.
वृत्तसंस्थाच्या प्राप्त माहितीनुसार, हरलीन कौर (वय २१ वर्ष, रा. विमाननगर) असे आत्महत्या केलेल्या महाविद्यालयीन युवतीचे नाव आहे.तिने १ फेब्रुवारी रोजी राहत्या घरी गळफास घेऊन आत्महत्या केली. या प्रकरणी हरलीनचा मित्र साईराज आणि मैत्रीण उत्कर्षा ससाणे यांच्या विरुद्ध गुन्हा दाखल करण्यात आला आहे.
हरलीन हाॅटेल व्यवस्थापन महाविद्यालयात शिक्षण घेत होती. तिने १ फेब्रुवारी राेजी राहत्या घरी गळफास घेऊन आत्महत्या केली. या घटनेनंतर कौर कुटुंबीय धार्मिक विधीसाठी अमृतसरला गेले होते. अमृतसरहून कौर कुटुंबीय पुण्यात परतले.
आईने हरलीनची वही, पुस्तक उघडून पाहिले. तेव्हा हरलीनने वहीत आत्महत्या करण्यापूर्वी लिहिलेली चिठ्ठी सापडली. मैत्रिणीने सिगारेट आणि गांजा ओढण्याची सवय लावली. मित्र साईराज दुसऱ्या मुलाशी प्रेमसंबंध असल्याच्या संशयावरुन मारहाण करायचा. मैत्रिणीने तिला धमकावले होते, असे हरलीनने चिठ्ठीत म्हटले होते. हरलीनच्या आईने याबाबत पोलिसांकडे तक्रार दिली. त्यानंतर या प्रकरणात गुन्हा दाखल करण्यात आला.
COMMENTS