डॉक्टरांच्या घरावर दरोडा; पोलिसांनी तिघांना ठोकल्या बेड्या

  अहमदनगर । नगर सह्याद्री येथील डॉ. अरूण जगन्नाथ वैद्य (वय 58 रा. वर्धमान रेसिडेन्सी, टिळक रोड, मुळ रा. कोर्ट गल्ली) हे राहत असलेल्या फ्लॅटव...

 

अहमदनगर । नगर सह्याद्री

येथील डॉ. अरूण जगन्नाथ वैद्य (वय 58 रा. वर्धमान रेसिडेन्सी, टिळक रोड, मुळ रा. कोर्ट गल्ली) हे राहत असलेल्या फ्लॅटवरील दरोडाप्रकरणी कोतवाली पोलिसांनी दोघांना तर स्थानिक गुन्हे शाखेने एकाला ताब्यात घेतले आहे. लवकरच दरोड्याचा गुन्हा उघडकीस येणार असल्याचे सूत्रांनी सांगितले.

सहा दरोडेखोरांनी डॉ. वैद्य यांचा टिळक रोडवरील पटेल मंगल कार्यालयाच्या मागे वर्धमान रेसिडेन्सीतील फ्लॅट फोडून लोखंडी रॉड, कोयताने दहशत करून सुमारे 21 लाखांचा ऐवज लंपास केला होता. यासंदर्भात कोतवाली पोलीस ठाण्यात दरोडेखारांविरूध्द गुन्हा दाखल करण्यात आला आहे. याचा तपास कोतवाली पोलिसांसह स्थानिक गुन्हे शाखेच्या पोलिसांकडून सुरू आहे.

 स्थानिक व्यक्तीने दिलेल्या खबरीनुसार बाहेरील टोळीने हा दरोडा टाकल्याचे समोर येताच कोतवालीने दोघांना तर स्थानिक गुन्हे शाखेच्या पोलिसांनी एकाला ताब्यात घेतले आहे. त्यांनी गुन्ह्याची कबुली दिली असून त्यांच्या साथीदारांचा शोध पोलिसांकडून सुरू आहे. साथीदारांचा  शोध घेऊन मुद्देमाल हस्तगत करण्याचे आव्हान पोलिसांसमोर आहे. स्थानिक तिघांनी बाहेरील जिल्ह्यातील दरोडेखोरांच्या टोळीला टीप दिल्याची माहिती पुढे आली आहे. पोलीस त्यादृष्टीकोनातून तपास करत आहेत. लवकरच त्यांना आणखी दरोडेखोरांना अटक करण्यात यश येईल, असे सूत्रांनी सांगितले.