पुणे रेल्वे स्थानकावर दहशतवादी हल्ल्याचा कॉल, तरुणाला अटक

पुणे रेल्वे स्थानकावर दहशतवादी हल्ला होऊ शकतो, अशी माहिती पोलिस नियंत्रण कक्षाला मिळाली होती.

पुणे / नगर सह्याद्री - 

महाराष्ट्रातील पुणे रेल्वे स्थानकावर दहशतवादी हल्ल्याचा कॉल पोलिसांना आला होता. त्यानंतर रेल्वे स्थानकावर मोठ्या प्रमाणात पोलीस बंदोबस्त तैनात करण्यात आला असून शोध मोहीम सुरू करण्यात आली आहे. मात्र, चौकशीअंती दहशतवादी हल्ल्याचा हा कॉल खोटा असल्याचे निष्पन्न झाले. याप्रकरणी पुणे पोलिसांनी एका तरुणाला अटक केली आहे. आरोपी तरुणाचे रेल्वे पोलीस दलातील एका कर्मचाऱ्यासोबत भांडण झाल्याचे तपासात समोर आले आहे. त्यानंतर त्याने पोलिस नियंत्रण कक्षाला दहशतवादी हल्ल्याचा खोटा कॉल केला.

शुक्रवारी पुणे रेल्वे स्थानकावर दहशतवादी हल्ला होऊ शकतो, अशी माहिती पोलिस नियंत्रण कक्षाला मिळाली होती. या घटनेची माहिती मिळताच पोलीस विभाग सतर्क झाला असून, स्थानकात मोठा पोलीस बंदोबस्त तैनात करण्यात आला आहे. यासोबतच तपासासाठी स्थानकावर श्वानपथकही तैनात करण्यात आले होते. मात्र, चौकशी घेतल्यानंतर काहीही संशयास्पद आढळले नाही, तेव्हा पोलिसांना हा फसवा कॉल असल्याचे समोर आले.

यानंतर पोलिसांनी फोन करणाऱ्याचा शोध सुरू केला. बरीच चौकशी केल्यानंतर पोलिसांनी आरोपीला पुण्यातील कात्रज परिसरातून अटक केली. चौकशीत आरोपीने सांगितले की, ट्रेनमध्ये प्रवासादरम्यान त्याचे रेल्वे पोलिस दलातील एका कर्मचाऱ्याशी भांडण झाले. त्यानंतर रागाच्या भरात त्याने दहशतवादी हल्ल्याचा फेक कॉल केला. पोलिसांनी आरोपीविरुद्ध गुन्हा दाखल करून त्याला अटक केली आहे.