आंबेडकरांचा ‘मविआ’शी संबंध नाही

 काँग्रेस प्रदेशाध्यक्ष नाना पटोले यांचे वक्तव्य मुंबई | वृत्तसंस्था  उद्धव ठाकरे आणि प्रकाश आंबेडकर यांच्या युतीशी महाविकास आघाडीचा काहीही ...

 काँग्रेस प्रदेशाध्यक्ष नाना पटोले यांचे वक्तव्य

मुंबई | वृत्तसंस्था 

उद्धव ठाकरे आणि प्रकाश आंबेडकर यांच्या युतीशी महाविकास आघाडीचा काहीही संबंध नाही, असे वक्तव्य काँग्रेस प्रदेशाध्यक्ष नाना पटोले यांनी केले. पटोले यांच्या या वक्तव्यानंतर महाविकास आघाडीत सर्वकाही आलबेल नसल्याचे बोलले जात आहे.

प्रकाश आंबेडकर यांच्या वंचित बहुजन आघाडीने उद्धव ठाकरे यांच्या शिवसेनेसोबत युती केली आहे. दोन्ही पक्षांच्या नेत्यांनी बाळासाहेब ठाकरे यांच्या जयंतीदिनी पत्रकार परिषद घेत युतीची घोषणा केली. यावेळी बोलताना प्रकाश आंबेडकर म्हणाले होते, आमचा विरोध केवळ राष्ट्रवादी काँग्रेसला होता. मात्र, राष्ट्रवादी काँग्रेसचे अध्यक्ष शरद पवार यांच्यासोबत आमचे पूर्वी चांगले सख्य होते. त्यामुळे काँग्रेस आणि राष्ट्रवादी काँग्रेस आम्हाला महाविकास आघाडीत घेण्यासाठी विरोध करणार नाही, असा विश्वास वाटतो. मात्र नाना पटोलेंच्या विधानामुळे आंबेडकर यांना महाविकास आघाडीत स्थान मिळेल का, याबाबत शंका उपस्थित केली जात आहे.

नाना पटोले यांनी यावर आपली प्रतिक्रिया देताना म्हटले की, प्रकाश आंबेडकर यांची उद्धव ठाकरे यांच्याशी युती झाली असून आंबेडकर यांचा महाविकास आघाडीशी काहीही संबंध नाही. आंबेडकरांना महाविकास आघाडीत घेण्याचा प्रस्तावही आमच्याकडे नाही. आंबेडकर यांची महाविकास आघाडीतील एन्ट्री केवळ मनघडन कहाणी आहे. प्रकाश आंबेडकरांबद्दल आम्हाला काही बोलायचे नाही. आम्ही त्यांना प्रस्ताव दिलेला नाही. पटोले यांच्या या वक्तव्यानंतर ठाकरे सेनेचे प्रवक्ते खा. संजय राऊत यांनी वंचित आघाडीला महाविकास आघाडीमध्ये घेण्यासाठी राहुल गांधी यांच्याशी चर्चा करणार असल्याचे सांगून पटोले यांना फारसे महत्त्व नसल्याचे अप्रत्यक्ष म्हटले आहे.