कंत्राटी वाहन चालकांचे जिल्हा परिषद आरोग्याधिकार्‍यांना निवेदन

अहमदनगर । नगर सह्याद्री- जिल्हा परिषदेच्या आरोग्य विभागातील 102 क्रमांकाच्या रुग्णवाहिका वाहन चालकांचे थकीत वेतन मिळण्याच्या मागणीसाठी जनआधा...

अहमदनगर । नगर सह्याद्री-

जिल्हा परिषदेच्या आरोग्य विभागातील 102 क्रमांकाच्या रुग्णवाहिका वाहन चालकांचे थकीत वेतन मिळण्याच्या मागणीसाठी जनआधार सामाजिक संघटनेच्या वतीने जिल्हा परिषदेचे जिल्हा आरोग्य अधिकारी डॉ. संदीप सांगळे यांना निवेदन देण्यात आले. 

निवेदनात म्हटले की, अहमदनगर जिल्हा परिषदेच्या अधिकाराखाली असणार्‍या आरोग्य विभागातील कंत्राटी 102 रुग्णवाहिका वाहन चालकांचे मागील सहा महिन्याचे थकीत वेतन कंत्राटदाराकडे बाकी आहे. नगरमध्ये जिल्हा परिषदेचे जवळपास 98 प्राथमिक आरोग्य केंद्र असून त्यासाठी 98 रुग्णवाहिका कार्यरत आहेत. त्यावर तेवढेच कंत्राटी वाहन चालक आहेत. पूर्वीच्या कंत्राकदाराने (मे. अष्टविनायक ट्रॅव्हल्स व ईश्वर ट्रॅव्हल्स) यांनीही वाहन चालकांचे तीन महिन्यांचे वेतन थकित ठेवले आहे.

वाहन चालकांना अनियमितपणे केलेले वेतन आणि वाहन चालकांच्या वेतनातील दिरंगाईमुळे आपल्या विभागाने त्याला हटवून नवीन ठेकेदाराची नेमणूक केली.  नव्याने कंत्राट दिलेल्या मे. दृष्टी सिक्युरिटी व पर्सनल सर्विसेस जळगाव व विंसोल सोल्युशन प्रायव्हेट लिमिटेड पुणे या कंपनीने देखील वेतनात दिरंगाई केली. सर्वसामान्य कुटुंबातील असणार्‍या वाहन चालकांचे व त्यांच्या कुटुंबियांचे दैनंदिन गरज भागवण्याचे मोठे आव्हान वाहन चालकांसमोर उभे आहे. मागील आठवड्यात याच प्रश्नावर मुख्य कार्यकारी अधिकार्‍यांची भेट घेतल्याने कंत्राटधारा मार्फत वाहन चालकांच्या खात्यावर 11 हजार रुपये मासिक एवढे वेतन जमा केले. परंतु वाहनचालकांचे मागील दोन महिन्याचे राहिलेले वेतन सध्याच्या कंत्राकदाराकडे तसेच पूर्वीच्या कंत्राटदाराकडे तीन महिन्याचे असे एकूण पाच महिन्याचे वेतन थकीत आहे. त्याचप्रमाणे वाहन चालकांचा पीएफओ आणि विमा देखील कंत्राटदाराने जमा केला नाही.

एखादा अपघात झाल्यास त्यास कंत्राटदार आणि प्रशासन जबाबदार असेल, असे निवेदनात म्हटले आहे. वाहन चालकांनी जीवाची पर्वा न करता कोरोना काळात सर्वसामान्यांची रात्रंदिवस सेवा केली. आज त्यांच्याच कुटुंबियांवर उपासमारीची वेळ आली आहे. जिल्हा परिषदेच्या नियमानुसार शासनाकडून कंत्राटदाराला काही अटी घातल्या आहेत. त्यानुसार जिल्हा परिषदेकडे निधीचा अभाव असताना देखील कंत्राटदाराने सर्व वाहनचालकांचे वेळेवर वेतन अदा करणे बंधनकारक आहे. परंतु त्याच नियमाचा भंग संबंधित संस्थेकडून होत असल्याने त्या कंत्राटदारावर कायदेशीर कारवाई करून मागील पाच महिन्याचे सर्व वाहनचालकांचे वेतन तत्काळ अदा करावे. वेतन तात्काळ न मिळाल्यास संघटनेच्या वतीने आरोग्य अधिकार्‍यांच्या दालनासमोर अमरण उपोषण करण्याचा इशाराही दिला आहे. 

यावेळी संघटनेचे संस्थापक अध्यक्ष प्रकाश पोटे, विजय मिसाळ, राहुल शिवशरण, बापूसाहेब वाघमोडे, सुधाकर खरात, बी. जी. लांडगे, विकास जठर, दत्तात्रेय गवळी, एस. पी. कसबे, दत्तात्रेय गायके, सौरव जाधव, माणिक निकम, शिवाजी देवकर, विजय दराडे, सय्यद फिरोज, पंकज खपके, सोमा येवले, संभा चव्हाण, जेम्स ससाने, बाबासाहेब नाईक, शंकर जाधव, अनिल हिगडे, अनिल गायकवाड, सुभाष नाईक, किरण गोरे, काशिनाथ नरवडे, साहेबराव थोरात, विनोद घुले आदीसह रुग्णवाहक चालक मोठ्या संख्येने उपस्थित होते.