अनिल देशमुख पोहोचले ईडी कार्यालयात!

राष्ट्रवादीचे नेते अनिल देशमुख यांना मनी लॉन्ड्रिंग प्रकरणात जामिनावर सुटल्यानंतर त्यांना दर सोमवारी ईडीसमोर हजर राहावे लागते.

मुंबई / नगर सह्याद्री - 

महाराष्ट्राचे माजी गृहमंत्री आणि राष्ट्रवादीचे नेते अनिल देशमुख आज मुंबईतील ईडी कार्यालयात पोहोचले आहेत. मनी लॉन्ड्रिंग प्रकरणात जामिनावर सुटल्यानंतर त्यांना दर सोमवारी ईडीसमोर हजर राहावे लागते. अनिल देशमुख यांना १२ डिसेंबर रोजी मुंबई उच्च न्यायालयाने एक लाख रुपयांच्या जामिनावर सशर्त जामीन मंजूर केला होता. परंतु सीबीआयने जामीन स्थगितीच्या आदेशाला सर्वोच्च न्यायालयात आव्हान देण्यासाठी अर्ज दाखल केला, ज्याला मुंबई उच्च न्यायालयाने मंजुरी दिली आणि सीबीआयच्या विनंतीवरून उच्च न्यायालयाने गेल्या आठवड्यात जामीन आदेशावरील स्थगिती २७ डिसेंबरपर्यंत वाढवली. होते. यानंतर त्यांना २८ डिसेंबर रोजी सोडण्यात आले.

अनिल देशमुख नोव्हेंबर २०२१ पासून तुरुंगात होते. त्यांना अंमलबजावणी संचालनालयाने (ईडी) कथित मनी लॉन्ड्रिंग प्रकरणात अटक केली होती. एप्रिल २०२१ मध्ये भ्रष्टाचाराच्या एका प्रकरणात सीबीआयने त्यांना अटक केली होती. देशमुख यांनी आपल्यावर लावण्यात आलेले आरोप फेटाळून लावले होते. ते बराच काळ मुंबईतील आर्थर रोड कारागृहात न्यायालयीन कोठडीत होते. उच्च न्यायालयाने त्यांना ऑक्टोबरमध्ये ईडीच्या खटल्यात जामीन मंजूर केला होता.