एक हजारासाठी अधीक्षक, निरीक्षक लाचेच्या जाळ्यात

अहमदनगर | नगर सह्याद्री वस्तू व सेवा कराच्या नोंदणी प्रमाणपत्राचा अर्ज मंजूर करण्यासाठी अधिकार्‍यांकडून १ हजार रुपयांच्या लाचेची मागणी करण्य...

अहमदनगर | नगर सह्याद्री

वस्तू व सेवा कराच्या नोंदणी प्रमाणपत्राचा अर्ज मंजूर करण्यासाठी अधिकार्‍यांकडून १ हजार रुपयांच्या लाचेची मागणी करण्यात आली. अर्जदाराने थेट सीबीआयच्या अँटी करप्शन ब्युरोकडे याची तक्रार केली.  सीबीआयनेही तत्काळ दखल घेत दोन दिवसात सापळा रचून कारवाई केली. नगर येथील वस्तू व सेवा कर अधीक्षकासह निरीक्षकाला लाच घेताना रंगेहाथ पकडण्यात आले.

अधीक्षक विजयकुमार राऊत (वय ५५, रा. राहिंजमळा, केडगाव, नगर) व निरीक्षक मुरली मनोहर (वय २७, रा. अमितनगर, नगर) अशी अटक केलेल्या दोघांची नावे आहेत. त्यांना न्यायालयासमोर हजर केले असता जिल्हा न्यायाधीश एस. गोसावी यांनी दोघांनाही ७ जानेवारी पर्यंत पोलिस कोठडी सुनावली असल्याची माहिती सीबीआयचे वकील डी. एन. म्हस्के यांनी दिली.

नगर येथील एका खाद्यतेल व्यावसायिकाला नव्या कंपनीची एजन्सी घ्यायची असल्याने त्यांनी १३ डिसेंबरला जीएसटी पोर्टलवर अर्ज केला होता. त्यानंतर २ जानेवारीला निरीक्षक मुरली मनोहर याने त्यांना फोन करून मार्केटयार्ड येथील किसान क्रांतीमधील कार्यालयात बोलावले. अर्जदाराने त्याच दिवशी कार्यालयात जाऊन त्याची भेट घेतली. निरीक्षक मुरली मनोहर याने अर्जदाराची ओळख अधीक्षक विजयकुमार राऊत याच्याशी करून दिली. अर्जदाराने अर्जासमवेत जोडलेले वीजबिल त्याच्या वडिलांच्या नावे असल्याने अर्ज नामंजूर होईल, असे या दोघांनी त्यांना सांगितले. एक हजार रुपये दिल्यास अर्ज मंजूर करू, असे म्हणत त्या दोघांनी लाचेची मागणी केली.

अर्जदाराने त्याच दिवशी सीबीआयच्या अँटी करप्शन ब्यूरोकडे तक्रार केली. सीबीआयने या एक हजार रुपये लाचेची तत्काळ दाखल घेत गुरुवारी सापळा रचला. अधीक्षक राऊत यांनी लाचेची मागणी करत सदर रक्कम निरीक्षकाला देण्यास सांगितले. अर्जदाराने लाचेची रक्कम निरीक्षकाला देताच सीबीआयच्या अँटी करप्शन ब्युरोच्या निरीक्षक शीतल शेंडगे यांच्या पथकाने दोघांना रंगेहाथ पकडले. या दोघांचीही पोलिस कोठडीत रवानगी करण्यात आली आहे. दरम्यान, एक हजार रुपयांच्या लाच प्रकरणात थेट जीएसटी अधीक्षक जेरबंद झाल्याने खळबळ उडाली आहे.