भररस्त्यात व्यापार्‍याचे साडेतीन लाख पळविले

पत्रकार चौक-तारकपूर रस्त्यावर रात्री साडेनऊ वाजता घडली घटना अहमदनगर । नगर सह्याद्री दुचाकीवरून घराकडे जाणार्‍या व्यापार्‍याकडील सुमारे तीन त...

पत्रकार चौक-तारकपूर रस्त्यावर रात्री साडेनऊ वाजता घडली घटना

अहमदनगर । नगर सह्याद्री

दुचाकीवरून घराकडे जाणार्‍या व्यापार्‍याकडील सुमारे तीन ते साडेतीन लाख रूपयांची रोख रक्कम दोन चोरट्यांनी लंपास केली. पत्रकार चौक ते तारकपूर बस स्थानकाकडे जाणार्‍या रोडवर मंगळवारी रात्री 9.25 वाजता ही घटना घडली.

या प्रकरणी व्यापारी सुनील लालचंद सिरवानी (वय 41 रा. सिंधी कॉलनी, तारकपूर) यांनी तोफखाना पोलीस ठाण्यात दिलेल्या फिर्यादीवरून दोन अनोळखीविरूद्ध जबरी चोरीचा गुन्हा दाखल करण्यात आला आहे. सिरवानी यांची डाळमंडईमध्ये खाद्य तेल, डाळ व तांदुळाची बी. जी. आर. ट्रेडिंग कंपनी आहे. सिरवानी यांनी दोन दिवसात धंद्यातून जमा झालेली रोख  रक्कम एका बॅगमध्ये भरली होती. ही रक्कम तीन ते साडेतीन लाख होती. रक्कम असलेली बॅग सिरवानी यांनी त्यांच्या मोपेड दुचाकीच्या डिक्कीत ठेवून रात्री घराकडे जाण्यासाठी निघाले.

सिरवानी पत्रकार चौक ते तारकपूर बसस्थानकाकडे जाणार्‍या रस्त्यावरून जात असताना मराठा मंदिर सायकल सेंटरच्या समोर पाठीमागून आलेल्या दुचाकीवरील दोघांनी सिरवानी यांच्या दुचाकीला कट मारून खाली पाडले. त्यातील एकाने सिरवानी यांना बाजूला धरून ठेवले तर दुसर्‍याने दुचाकीच्या डिक्कीत ठेवलेली पैशाची बॅग ताब्यात घेऊन दोन्ही चोर डीएसपी चौकाच्या दिशेने वेगात निघून गेल्याचे फिर्यादीत म्हटले आहे.