अलिगढ : जवळपास सात वर्षांपूर्वी एका १४ वर्षीय मुलीच्या खुनाचा पोलीस प्रकरणाचा तातडीने तपास करतात. खून प्रकरणात शेजारी राहणारा तरुण दोषी आढळ...
अलिगढ : जवळपास सात वर्षांपूर्वी एका १४ वर्षीय मुलीच्या खुनाचा पोलीस प्रकरणाचा तातडीने तपास करतात. खून प्रकरणात शेजारी राहणारा तरुण दोषी आढळतो. त्याच्यावर रीतसर खटला चालतो आणि त्याला खूनाच्या गुन्ह्याखाली शिक्षाही होते. पण सात वर्षांनंतर अचानक कुटुंबियांच्या लक्षात येते की ती मुलगी जिवंत आहे. एखाद्या चित्रपटाच्या कथानकात शोभेल असा प्रकार उत्तर प्रदेशच्या अलिगढमध्ये घडला. मुलगी जिवंत असल्याचे सांगत तुरुंगात शिक्षा भोगत असणार्‍या आरोपीच्या कुटुंबियांनी पोलिसांना याची माहिती देताच पोलिसांनी तातडीने पावले उचलली आहे.
२०१५ मध्ये अलिगढमध्ये या सगळ्या प्रकाराला सुरुवात झाली. आपल्या १४ वर्षांच्या मुलीच्या बेपत्ता होण्याची तक्रार एका कुटुंबाने पोलिसांकडे केली होती. काही दिवसांनी आग्र्यामध्ये त्याच वयाच्या आणि अंगकाठीच्या एका मुलीचा मृतदेह पोलिसांना आढळला. पोलिसांना शंका आल्यानंतर त्यांनी मुलीच्या वडिलांना ओळख करण्यासाठी बोलावले. वडिलांनी हीच आपली मुलगी असल्याची कबुली दिली. यानंतर प्रकरणाचा सविस्तर तपास करून मुलीच्या शेजारीच राहणार्‍या एका २० वर्षीय तरुणाला पोलिसांनी मुलीचे अपहरण आणि हत्या प्रकरणात अटक केली. रीतसर सुनावणीनंतर न्यायालयाने आरोपीला तुरुंगवासाची शिक्षा सुनावल्याने आरोपी गेल्या सात वर्षांपासून तुरुंगवास भोगत आहे. आता पुन्हा एकदा पोलिसांना या प्रकरणाचा तपास सुरू करावा लागला आहे. कारण यावेळी आरोपीच्या कुटुंबियांनी पोलिसांत धाव घेतली. जिच्या खुनाच्या आरोपांखाली मुलगा शिक्षा भोगत आहे, ती मुलगी हथरसमध्ये जिवंत असल्याचा दावा कुटुंबियांनी केला. ती मुलगी जिवंत असून हथरसमध्ये तिने संसार थाटला आहे. आता ही मुलगी २१ वर्षांची असून तिला दोन मुलंही आहेत, असा दावा आरोपीच्या कुटुंबियांनी केला. पोलिसांनी हथरसमध्ये जाऊन मुलीला चौकशीसाठी अलिगढला आणले. या मुलीला न्यायालयासमोर हजर करण्यात आले. तिचा जबाब नोंदवून घेतल्यानंतर आता पोलिसांनी या मुलीला अलिगढमधील प्रोटेशन सेंटरमध्ये ठेवले. तिची डीएनए चाचणीही केली जाणार आहे. यामध्ये जर ही तीच मुलगी असल्याचे निष्पन्न झाल्यास आरोपीविरोधात लावलेली कलम रद्दबातल करण्याचा दावा नातेवाईक करू शकतात.
COMMENTS