श्री क्षेत्र कोरठण खंडोबा यात्रोत्सवात पशुहत्या, गॅस सिलिंडरला बंदी

  वार्षिक यात्रोत्सवासाठी प्रशासकीय अधिकारी, देवस्थान ट्रस्ट बैठक । देवस्थान परिसरात आपत्ती व्यवस्थापन, आरोग्य कक्ष पारनेर । नगर सह्याद्री  ...

 

वार्षिक यात्रोत्सवासाठी प्रशासकीय अधिकारी, देवस्थान ट्रस्ट बैठक । देवस्थान परिसरात आपत्ती व्यवस्थापन, आरोग्य कक्ष

पारनेर । नगर सह्याद्री 

प्रतिजेजुरी श्री. क्षेत्र कोरठण खंडोबा देवस्थान पिंपळगाव रोठा येथील पौष पोर्णिमेला 6 जानेवारीपासून दोन दिवसीय यात्रोत्सव होत असून देवस्थान व प्रशासन यांची बुधवारी कोरठण खंडोबा देवस्थान सभागृहात संयुक्त बैठक झाली. यात्रोत्सव काळात अग्निशमन दलाची गाडी व रूग्णवाहिका 24 तास उपलब्ध करून देण्यात येणार आहे. व्हीआयपीसह इतर मान्यवरांसाठी अक्कलवाडीचा रोड वापरण्यात येणार आहे. 

या यात्रोत्सवाबाबत मानाच्या ब्राम्हण वाडा व बेल्हा काठी व पालखी मालकांबरोबर चर्चा करण्यात आली. त्यामुळे मानाच्या काठ्या कळसाला व मंदिर गाभारात मान दिला जाणार आहे. त्यावरुन वाद घालू नये असे आवाहन पोलिस निरीक्षक घनश्याम बळप यांनी केले आहे. 9 मानाच्या पालखीवाले मानकरी बैठकीस उपस्थित होते. मंदिर परिसरात अर्धा किलोमीटरपर्यंत सीसीटीव्ही कॅमेरे बसविण्यात येणार आहेत. यात्रोत्सवात गॅस सीलिंडर, पशुहत्या बंदी असल्याचे ज्येष्ठ विश्वस्त राजेंद्र चौधरी व माजी सरपंच अशोक घुले यांनी सांगितले. यात्रोत्सव नियोजनाची बैठक बुधवारी निवासी नायब तहसीलदार गणेश आढारी, पोलीस निरीक्षक घनश्याम बळप, गटविकास अधिकारी किशोर माने, राज्य उत्पादन शुल्क निरीक्षक अप्पासाहेब बनकर, उपनिरीक्षक उमेश ढोले, आगार व्यवस्थापक पराग भोपळे, देवस्थानच्या अध्यक्षा शालिनी अशोक घुले, उपाध्यक्ष महेश भास्कर शिरोळे, खजिनदार तुकाराम बाळाजी जगताप, सचिव जालिंदर महादू खोसे, सहसचिव कमलेश अर्जुन घुले, यात्रा कमिटी अध्यक्ष सुरेश पांडुरंग फापाळे, पिंपळगाव रोठा गावचे उपसरपंच व विश्वस्त दादाभाऊ पांडुरंग पुंडे, माजी सरपंच अशोक घुले, देवस्थानचे विश्वस्त राजेंद्र भिका चौधरी, सुवर्णा अतुल घाडगे, दिलीप रामचंद्र घुले, मंडलाधिकारी पंकज जगदाळे, तालुका आरोग्य अधिकारी डॉ. सुदाम बागल, डॉ. प्रतिक शिंदे, जी.ई.शिंदे, आर. एस. शिंदे यांच्यासह अधिकारी दिलीप जगताप, स्वप्नील जगताप, किरण शेलार, प्रदीप खोसे उपस्थित होते. 

पोलिस दल दोन कंट्रोल रुम उभारणार आहे. कोरठण गडावर जाणार्‍या सर्वच रस्त्यांची सार्वजनिक विभागाकडून डागडुजी करण्यात येणार असून भाविकांच्या वाहनांना अडथळा येणारी अतिक्रमणे काढण्यात येणार आहेत. आरोग्य विभागाचे पथक 24 तास सेवेत राहणार असून सर्व अद्ययावत सुविधांसह सर्वच विभाग सतर्क राहून यात्रा उत्साहात पार पाडतील, असे आश्वासन प्रशासनाच्या वतीने आश्वासन देण्यात आले आहे. यात्रा उत्सवाचे प्रमुख आकर्षण मानाच्या पालख्या व मानाच्या काठ्यांची आकर्षक मिरवणूक असणार आहे. प्रशासनाने जय्यत तयारी केली असून देवस्थानच्या वतीने त्यासाठी सुसज्ज व्यवस्था केली आहे. 

महिलांना आवाहन 

पिंपळगाव रोठा येथील खंडोबा देवस्थानच्या तीन दिवशीय वार्षिक यात्रोत्सवात लाखो भाविक येणार आहेत. महिलांनी आपल्या लहान मुलांसह मौल्यवान वस्तू व दागिने सांभाळण्याचे आवाहन पोलिस निरीक्षक घनश्याम बळप यांनी केले आहे. देवाच्या दारात दागिन्यांचे व मौल्यवान वस्तूंचे प्रदर्शन करू नये, असेही त्यांनी म्हटले आहे.