१०६ अनाथांना मिळाले हक्काचे कुटुंब !

पुणे / नगर सहयाद्री  मुलाला जन्माने जे अधिकार मिळतात ते सर्व अधिकार आणि विशेषाधिकार दत्तक विधान आदेशामुळे प्राप्त होणार आहेत.नवीन दत्तक नियम...

पुणे / नगर सहयाद्री 

मुलाला जन्माने जे अधिकार मिळतात ते सर्व अधिकार आणि विशेषाधिकार दत्तक विधान आदेशामुळे प्राप्त होणार आहेत.नवीन दत्तक नियमावली अमलात आल्यापासून जिल्हाधिकारी डॉ. राजेश देशमुख यांनी गेल्या दीड महिन्यात १०६ बालकांचे दत्तक विधान आदेश केले आहेत. त्यामुळे या अनाथ, सोडून दिलेल्या बालकांना कायदेशीर पालक मिळाले आहेत.

दत्तक विधान आदेश प्रक्रिया ही किचकट होती.यामध्ये बाल कल्याण समितीने बालकाला दत्तकासाठी मुक्त केल्यावर आणि दत्तक समितीने मान्यता दिल्यानंतर संस्था दत्तकसाठीचे अर्ज वकिलामार्फत न्यायालयामध्ये दाखल करायची.न्यायाधीश दत्तकाचे आदेश देत होते.मात्र,केंद्रीय दत्तक स्त्रोत प्राधिकरणाद्वारे २३ सप्टेंबर २०२२ च्या अधिनसूचनेनुसार नवीन दत्तक नियमावली बनवण्यात आली.त्यानुसार जिल्हाधिकाऱ्यांकडून बालकांचे दत्तक आदेश देण्यात येत आहेत.

दत्तक विधानाची सुरुवात चालू वर्षी १४ नोव्हेंबर या बालदिनाचे औचित्य साधून करण्यात आली.१०६ दत्तक आदेश झालेल्या बालकांपैकी ९० बालके देशांतर्गत दत्तक देण्यात आली आहेत,तर १६ बालके परदेशामध्ये दत्तक देण्यात आली आहेत.या दत्तक आदेशामुळे या मुलांना त्यांच्या हक्काचे कायदेशीर पालक आणि हक्काचे कुटुंब मिळाले आहे.मुलाला जन्माने जे अधिकार मिळतात ते सर्व अधिकार आणि विशेषाधिकार दत्तक विधान आदेशामुळे प्राप्त होणार आहेत.

मूल दत्तक घ्यावयाचे आहे त्यांनी दत्तक प्रक्रिया अंतर्गत बाळ दत्तक घेण्यासाठी https://cara.nic.in या संकेत स्थळावर नोंदणी करणे आवश्यक आहे. नोंदणी केल्यानंतर दत्तक इच्छुक पालकांची गृह भेट, सामाजिक तपासणी, आवश्यक दस्त ऐवजांची पूर्तता झाल्यानंतर ‘कारा’ संकेतस्थळावरून दत्तक नियमावली २०२२ नुसार सर्व दत्तक विधान प्रक्रिया केली जाते. जिल्हा बाल संरक्षण अधिकारी यांच्यामार्फत छाननी करून ते जिल्हाधिकाऱ्यांकडे पाठविले जाते.जिल्हाधिकाऱ्यांकडून बालकांचे दत्तक आदेश देण्यात येतो.