भारत बायोटेकच्या इंट्रानसल कोरोना लस इन्कोव्हॅकची किंमत निश्चित!

भारत बायोटेकच्या नाकातून दिल्या जाणाऱ्या इंट्रानसल कोरोना लस इन्कोव्हॅक ची किंमत निश्चित करण्यात आली आहे.

नवी दिल्ली / नगर सह्याद्री - 

भारत बायोटेकच्या नाकातून दिल्या जाणाऱ्या इंट्रानसल कोरोना लस इन्कोव्हॅक ची किंमत निश्चित करण्यात आली आहे. मीडिया रिपोर्ट्सनुसार, खासगी हॉस्पिटलमध्ये एका डोसची किंमत ८०० रुपये असेल. याशिवाय पाच टक्के जीएसटीही भरावा लागणार आहे. खाजगी रुग्णालयांना एका डोससाठी १५० रुपये प्रशासकीय शुल्क आकारण्याची परवानगी आहे. अशाप्रकारे, या लसीच्या एका डोसची किंमत सध्या सुमारे १००० रुपये असेल. भारत बायोटेकची इंट्रानसल लस इन्कोव्हॅक गेल्या आठवड्यातच कोरोना लसीकरण कार्यक्रमात समाविष्ट करण्यात आली होती.

कोवॅक्सिन किंवा कोविशील्डने पूर्णपणे लसीकरण केलेल्या लोकांसाठी इंट्रानसल लस यापूर्वी बूस्टर शॉट म्हणून मंजूर करण्यात आली आहे. अहवालानुसार, जानेवारीच्या अखेरीस ज्यांनी कोरोना लसीचे दोन्ही डोस घेतले आहेत त्यांच्यासाठी ती उपलब्ध होईल.

केंद्रीय आरोग्य मंत्री मनसुख मांडविया यांनी शुक्रवारी सांगितले होते की, केंद्र सरकारने कोविड-१९ लसीकरण मोहिमेत इन्कोव्हॅकचा समावेश करण्यास मान्यता दिली आहे. सुरुवातीला ही लस खासगी रुग्णालयांमध्ये उपलब्ध असेल आणि ती कोविन अँपमध्ये जोडली जाईल, असेही त्यांनी सांगितले.

भारत बायोटेकने वॉशिंग्टन विद्यापीठाच्या सहकार्याने ही इंट्रानसल लस तयार केली आहे. भारत बायोटेकचे अध्यक्ष आणि व्यवस्थापकीय संचालक डॉ. कृष्णा एला यांच्या मते, 'इन्कोव्हॅक' कोविडविरुद्ध प्रभावी आहे. हे कोविड-१९ विरुद्ध म्यूकोसेल प्रतिकारशक्ती प्रदान करते. या लसीद्वारे आम्ही अशी कोविड रोगप्रतिकारक प्रणाली विकसित केली आहे, जी अमेरिकेतही नाही.