कांद्यात वांदा; चार लाखांची फसवणूक

  अहमदनगर । नगर सह्याद्री  पदुचेरी येथील कांदा व्यापार्‍याने येथील कांदा व्यापार्‍याकडून 25 हजार 640 किलो कांदा खरेदी करून त्याचे तीन लाख 84...

 

अहमदनगर । नगर सह्याद्री 

पदुचेरी येथील कांदा व्यापार्‍याने येथील कांदा व्यापार्‍याकडून 25 हजार 640 किलो कांदा खरेदी करून त्याचे तीन लाख 84 हजार 600 रूपये न देता फसवणूक केली. या प्रकरणी येथील कांदा व्यापारी रियाज आलम शेख (वय 34 रा. ताठेमळा, सावेडी) यांनी तोफखाना पोलीस ठाण्यात दिलेल्या फिर्यादीवरून पी. सेल्वकुमारन (रा. पदुचेरी) याच्याविरूद्ध गुन्हा दाखल करण्यात आला आहे. 

शेख यांचा आयेशा ट्रेडर्स नावाने कांदा खरेदी-विक्रीचा व्यवसाय आहे. त्यांनी पी. सेल्वकुमारन याला 2 जुलैला रात्री ट्रकमध्ये 25 हजार 640 किलो कांदा पाठविला होता. हा कांदा 15 रूपये किलोप्रमाणे देण्यात आला होता. याचे तीन लाख 84 हजार 600 रूपये झाले. कांदा पाठविण्यापूर्वी 5 जुलैला पैसे खात्यावर टाकण्याचे आश्वासन पी. सेल्वकुमारन याने दिले होते. 

4 जुलैला कांद्याचा ट्रक पोहच झाल्याचे पी. सेल्वकुमारन याने शेख यांना फोन करून सांगितले होते. शेख यांनी ठरल्याप्रमाणे 5 जुलैला पैशासाठी पी. सेल्वकुमारनला फोन केला. शेख यांना पैसे मिळाले नाही. पी. सेल्वकुमारन याने कुरियरव्दारे साऊथ इंडिय बँकेचा चेक पाठविला होता. तो चेक वटला गेला नाही. शेख यांनी वारंवार संपर्क साधून पैसे देण्याची विनंती केली. शेख पदुचेरी येथे त्याच्याकडे जावून आले. त्याने पैसे देणार असल्याचे सांगून पुन्हा येथे येऊ नका, नाहीतर खोटा गुन्हा दाखल करीन, अशी धमकी दिल्याने फसवणूक झाल्याचे शेख यांच्या लक्षात आल्यानंतर त्यांनी 29 डिसेंबरला तोफखाना पोलीस ठाण्यात फिर्याद दिली.